संघय् १५ गू जक मन्त्रालय
येँ (नेपालभाषा टाइम्स)- राष्ट्रिय सभां नीस्वंगु संघीयता कार्यान्वयन अध्ययन तथा अनुगमन विशेष समितिं संघीय मन्त्रालयत म्हो यानाः झिंन्यागू जक दयेकेत निर्देशन बिउगु दु । म्हिगः च्वंगु समितिया बैठकय् संघीय मन्त्रालयया ल्याः झिंन्यागू यानाः संघीय तहलय् दुगु विभागत बछि स्वयां अप्वः खारेज यायेत नं सरकारयात निर्देशन बिउगु दु ।
मन्त्रालयया ल्याः झिंन्यागू दयेकेत सरकारयात २०८० असार तकया ई बिउगु दु । समितिं प्रदेश सरकारय् नं मन्त्रालयया ल्याः ११ गू स्वयां अप्वः मदयेकेत सिफारिस याःगु दु । समितिं प्रदेश मन्त्रीया ल्याः म्होतिं न्याम्ह स्वयां म्हो मजुइ कथं मुक्कं प्रदेशसभा दुजःया १० प्रतिशतय् लिकुंकेत कानुन न्याय तथा संसदीय मामिला मन्त्रालययात सिफारिस याःगु दु ।
समितिं याःगु सिफारिसय् धयातःगु दु, ‘प्रदेश मन्त्रालय व मन्त्रीया ल्याः अप्वःगु कारणं प्रशासनिक खर्च अप्वःगु लिसें आम जनताय् संघीयता प्रतिया विश्वास म्हो जुयावंगुु स्थितिइ प्रदेश मन्त्रीया ल्याः म्होतिं न्याम्ह स्वयां म्हो मजुइकेत सिफारिस याना ।’
समितिं स्थानीय तहया कार्य जिम्मेवारी, वित्तीय स्रोत व साधनय् तःधंगु हिउपाः वःगुलिं स्थानीय तहया प्रमुख प्रशासकीय अधिकृत उपसचिव स्वयां क्वय्या दर्जाया कर्मचारी जुइ मजीकथंया नीतिगत व्यवस्था यायेत नं सामान्य प्रशासन मन्त्रालय व प्रदेशया सम्बन्धित मन्त्रालययात सिफारिस याःगु दु ।
उकथं हे कर्मचारीया जवाफदेहिता सम्बन्धी कानुन दयेकेत, सार्वजनिक सेवा प्रवाह जुइगु थासय् सीसी क्यामेरा जडान यायेत, प्रधानमन्त्रीया अध्यक्षताय् उच्चस्तरीय प्रशासन सुधान आयोग नीस्वनेत, संघय् दुपिं बछि कर्मचारी कटौती यायेत, निदँ तक सेवा मयाःपिं कर्मचारीया बढुवा मयायेत, स्थानीय तहया प्रमुख प्रशासकीय अधिकृतया जिम्मेवारी प्रदेश सरकारयात हस्तान्तरण यायेत, फुक्कं प्रदेशया सवारी साधन करय् एकरुपता कायम यायेत, कानुन अःखः न्ह्यानाच्वंगु क्रसर उद्योग चीकेत, स्वंगुलिं तहया सरकारया बजेटया सीमा क्वःछीत समितिं सम्ब–न्धित निकाययात सिफारिस याःगु दु ।
LEAVE YOUR COMMENTS