‘बजेट केन्द्रीकृत जुल, नेवाःतय्त प्रत्यक्ष लिच्वः लाइ’

येँ – सरकारं आर्थिक दँ २०७७/७८या निंतिं न्ह्यब्वःगु बजेट केन्द्रीकृत जूगुलिं थुकिं नेवाःतय्त प्रत्यक्ष लिच्वः लाकीगु खँ विज्ञतय्सं धाःगु दु ।

सरकारं सार्वजनिक याःगु बजेटय् स्वनिगः दुने प्यंगू न्हूगु उपशहर निर्माण यायेगु नापं चोभारय् सुख्खा बन्दरगाहाया निंतिं ध्यबा फ्यनातःगुलिं थुकीं स्वनिगः दुने च्वंपिं नेवाःतय्त प्रत्यक्ष रुपं लिच्वः लाइगु खँ विज्ञतय्सं धाःगु दु ।

नेवाः देय् दबूया ग्वसालय् बजेटया बारे नेवाःतय् दृष्टिकोण नामं शनिवाः जूगु भर्चुअल संवाद ज्याझ्वलय् विज्ञतय्सं बजेट केन्द्रीकृत जूगु व गाँमुखी मजूगुलिं मेमेगू जिल्लाय् च्वनाच्वंपिं नेवाःतय्त नं नकारात्मक लिच्वः लाकीगु खँ धयादीगु खः ।

देय् दबूया नायः नरेश ताम्राकारया नायःसुइ जूगु ज्याझ्वलय् देय् दबूया सल्लाहकार नापं राष्ट्रिय योजना आयोगया पुलाम्ह दुजः डा. पुष्पराज राजकर्णिकारं बजेटया बांलागु व कमजोर पक्षयात कया थःगु प्रस्तुति न्ह्यब्वयादीगु खः । वय्कलं नेवाःतय्गु सामाजिक, सांस्कृति, आर्थिक नापं जनजीवनय् लाकीगु लिच्वःया बारे थःगु बिचाः प्वंकादीगु खः ।

उगु प्रस्तुतियात कयाः वरिष्ठ अर्थशास्त्री डा. दुर्गालाल श्रेष्ठं टिप्पणी यानादीगु खः । ज्याझ्वलय् देय् दबूया थीथी जिल्ला समितिया दुजः नापं थीथी ख्यःया मनूतय् ब्वति दुगु खः ।

मुज्याँय् बजेटय् कोरोना महामारीया कारणं धरासायी जुयाच्वंगु देय्या अर्थतन्त्रयात पुनःस्थापना यायेगु निंतिं बल्लागु नीति मदुगु, उद्योग, कलकारखाना, कृषि उत्पादन नापं चीधंगु व्यवसाययात प्रोत्साहन यायेगु दीर्घकालीन योजना मदुगु बारे सहलह जूगु खः ।

अथेहे लकडाउनया इलय् सरकारं राहतया सही व्यवस्थापन यायेमफुगुलिं स्वनिगःया नेवाः ज्याःमि, कृषक, मजदुर नापं छेँय् थुवाःत मर्काय् लानाच्वंगु निष्कर्ष नं पिकाःगु खः ।