वज्राचार्य अध्ययन मण्डल, नेपालया ३९ क्वःगु बुन्हि

येँ- वज्राचार्य अध्ययन मण्डल, नेपालया स्वीगुक्वःगु बुन्हि छगू ज्याझ्वःया दथुइ हन । संस्थाया नायः गोपाल वज्राचार्यया सभापतित्वय् जूगु ज्याझ्वलय् मूपाहांकथं हेरारत्न वज्राचार्य झायादीगु खः । ज्याझ्वः गुणाकर महाविहार छुस्याबहालय् जूगु खः ।

मण्डलया पुलांंम्ह शिष्य राजु वज्राचार्यं त्रिरत्न शरणगमन प्रार्थना यानादीगु ज्याझ्वलय् दशरत्न वज्राचार्यं आकाझाकां दिवंगत जुयादीम्ह मण्डलया शिष्य दिपंकररत्न वज्राचार्यया नामं दुर्गतिपरिशोधन पाठ यानादीगु खः ।

मण्डलया न्वकु सानुराजा वज्राचार्यं लसकुस यानादीगु ज्याझ्वलय् राजेन्द्र दिव्य हरि प्रतिष्ठान येँपाखें नीस्वंगु ‘पं. बद्रीरत्न वज्राचार्य वज्रयान उत्थान पुरस्कार’ लुम्बिनी विश्वविद्यालयया उपकुलपति प्रा.डा. नरेशमान वज्राचार्ययात लःल्हाःगु खः । वज्रयानया उत्थानया नितिं महत्वपूर्ण योगदान यानाबिज्याःगु व शाक्यमुनि बुद्धभूमि नेपालय् वज्रयान विहार धस्वाकेत महत्वपूर्ण भूमिका म्हितूगु धासें नगद सिरपाः नापं हनापौ लःल्हाःगु खः ।

ज्याझ्वलय् नवासें पुरस्कृति व्यक्तित्व प्रा.डा. वज्राचार्यं मण्डलया प्रगति गुकथं जुइमाःगु खः, उलि सन्तोष जनक मजूगु धासें आः छुंकथंया पलाः न्ह्याकाः जूसां वज्रयानया विकासया निंतिं पलाः न्ह्याकेगु प्रतिवद्धता प्वंकादिसें उकिया निंतिं राज्यपाखें नं ग्वाहालि यायेमाः धयादिल ।

प्रतिष्ठानया मू संरक्षक राजेन्द्रमान वज्राचार्यं वज्रयान, बुद्ध धर्मया किवासया निंतिं मण्डलनापं सहकार्य याना वनेगु व माःकथंया ग्वाहालि यायेगु जुइ धयादिल । स्वनिगलं पिने मौलिक बौद्ध धर्म नापं बौद्ध संस्कार व संस्कृति न्हना वनाच्वंगु अवस्थाय् उकियात हाकनं ब्वलंकेगु ल्याखं दिवंगत महागुरु पं. बद्रीरत्न गुरुजुं उगु अध्ययन मण्डल २०३६ सालय् स्थापना यानाबिज्याःगु खः ।