उदाय समाजया दँमुँज्या

येँ(नेपालभाषा टाइम्स)÷ उदाय समाजया नीगुक्वःगु दँमुँज्या कसाःख्यः दलु आवासय् छगू ज्याझ्वःया दथुइ जुल । दँमुँज्याय् थीथी ख्यलय् उत्कृष्ट योगदान बियादीपिं नापं शिक्षा ख्यलय् उत्कृष्ट ल्याः हयादीपिं समाजया जः दुजः व छात्रछात्रापिंत हनेज्यालिसें थीथी सिरपाः नं लःल्हाःगु खः ।

समाजया नायः डा. रुपज्योति कसाःया सभापतित्वय् जूगु ज्याझ्वलय् पे्रमरत्न स्थापितं लसकुस यानादीगु खः । दँमुँज्याय् समाजया मूछ्याञ्जे रजनी ताम्राकारं वार्षिक प्रगति प्रतिवेदन व दांभरि दिव्यलक्ष्मी कसां आर्थिक प्रतिवेदन न्ह्यब्वयादीगु खः । उदाय समाज दुनेया थीथी कवःया नायःपिंसं भिंतुना न्वचुलिसें थःथःगु नुगःखँ तयादीगु दँमुँज्याय् तगिं छगूनिसें तगिं झिंनिगू तकया ब्वँमिपिंत छात्रवृत्ति लःल्हाःगु खःसा एसइइ, झिंनिगू तगिं, स्नातक व स्नातकोत्तर तहया परीक्षाय् उत्कृष्ट जुयादीपिंत थीथी सिरपाः नं लःल्हाःगु खः । अथेहे इन्जिनियर, चिकित्सकलिसें ज्याः जंक्व यायेधुंकूपिं समाजया ज्याथःजिथिपिं, याकःमिसा व फरककथं जीवन हनाच्वंपिं समाजया जःपिंत नं उगु ज्याझ्वलय् हनेज्या याःगु खः ।

थुकथं हे ज्याझ्वलय् उत्कृष्ट उदाय साहित्यकारकथं छम्हेसित सिरपाः व बुद्ध धर्म व नेपालभाषा ख्यलय् विशिष्ट योगदान बियादीपिं निम्हेसित नं हनेज्या याःगु खः । उदाय ज्याझ्वःया कजि डा. ज्ञानेन्द्ररत्न तुलाधरं उदाय समाजया विधि व्यवहारया संरक्षण व संवद्र्धनया निर्देशिका किताब छेँय् छेँय् थ्यंकेगु समाजयात कुतःयात क्युआर कोड दुगु वाल पोष्ट दयेकाः सकसिगुं ल्हातय् थ्यंकेत प्रवद्र्धन यायेगु ज्या नं याःगु खः ।