मोतिलक्ष्मी उपासिकाया ११४ क्वःगु बुन्हि

येँँ(नेपालभाषा टाइम्स)÷ नेपालभाषा मिसा खलःया संस्थापक नायःलिसें नेपालभाषाया न्हापांम्ह मिसा बाखं च्वमि मोतिलक्ष्मी उपासिकाया ११४ क्वःगु बुदिं हन । नेपालभाषा मिसा खलकं वंगु दिल्लाथ्व द्वादशिकुन्ह मोतिलक्ष्मी उपासिकाया बुन्हि हंगु खः । मोतिलक्ष्मी उपासिकाया बुन्हि स्वयम्भूस्थित खलःया थःगु हे जिथि भलसा छेँ (लचना होम्सं)य् हंगु खः ।

खलःया नायः धर्मशोभा तुलाधरया सभापतित्वय जूगु ज्याझ्वलय् खलःया पुलांम्ह नायः मंगला कारंजित मूपाहांकथं झायादीगु खः । खलःया न्वकु निर्मला तुलाधरं लसकुस यानादीगु ज्याझ्वलय् मोतिलक्ष्मी उपासिकाया किपाय् स्वां देछासे वय्कलं नेपालभाषा साहित्य, बौद्ध धर्म व सामाजिक ख्यलय् बियादीगु योगदानलिसें वय्कःया जीवनयात कयाः चर्चा याःगु खः ।

मिसा खलःया नायः तुलाधरं मोतिलक्ष्मी उपासिकाया सादा जीवन सकसिगुं निंतिं पे्ररणा जूगु विचाः तयादीगु खः । ज्याझ्वलय् मिसा खलकं संचालन यानाच्वंगु लचना होम्सया विद्यार्थीतय्सं थीथी हुलाप्याखं नं न्ह्यब्वःगु खः ।