थिमिया लाय्कू साःया शिलान्यास

थिमि (नेपालभाषा टाइम्स) – मध्यपुर थिमिइ च्वंगु ऐतिहासिक महत्वं जाःगु साः पुनःनिर्माण याइगु जूगु दु। थिमिया ऐतिहासिक महत्वं जाःगु लाय् कूसाः पुनःनिर्माणया निंतिं आः नकतिनि शिलान्यास यायेगु ज्या जुल ।

साय्मि समुदायया पुख्र्याैली पेशा तू तिकं दयेकेगु आपालं थासय् च्वंगु साःया अस्तित्व संकटय् लाना वनाच्वंगु अवस्थाय् थनया साःयात पुनर्जीवित यायेगु निंतिं मध्यपुर थिमि नगरपालिकां पहल याःगु खः । स्थानीय मानन्धर समुदायया पुख्र्यौली पेशा चिकं दयेकेगु घरेलु साः न्हना वनीगु अवस्था वयेवं थुकियात म्वाकेत अभियानकथं हे न्ह्याकूगु व उकियात मध्यपुर थिमि नगरपालिकां सहकार्य यायेत्यंगु खः ।

थ्व झ्वलय् वंगु तछलागा षष्ठि (जेठ २९) विहीवाः कुन्हु मध्यपुर थिमि नपा वडा नं ४ साःननि त्वालय् च्वंगु लाय्कू साः पुनःनिर्माणया निंतिं शिलान्यास यायेगु ज्या जूगु खः । मध्यपुर थिमि नगरपालिकाया प्रमुख मदनसुन्दर श्रेष्ठ, उपप्रमुख अञ्जना मधिकःमि, वडा नं. ४या वडाअध्यक्ष कुमार श्रेष्ठ, वडा नं. ६ या वडाअध्यक्ष इन्द्रबहादुर प्रजापति, सिवाः साय्मि खलःया नायः अष्टरत्न मानन्धर, साः पुनःनिर्माण उपभोक्ता समितिया पदाधिकारी लगायत स्थानीयवासीतय् उपस्थितिया दथुइ मानन्धर समुदायया ज्याःजंक्व सिधयेधुंकूपिं प्यम्ह ज्याथपिंसं शिलान्यास यानादीगु खः ।

उगु साः पुनःनिर्माणया निंतिं नगरपालिकां आर्थिक दँ ०७६-७७ य् ५० गू लख बजेट विनियोजन याःगु खः । साः भवन निर्माणया निंतिं गंगाराम मानन्धरया अध्यक्षताय् उपभोक्ता समिति गठन यानातःगु दुसा साः पुनःनिर्माणया निंतिं नेपाली कांग्रेस मध्यपुर नगर कमिटीया सचिव राजेश मानन्धरं विशेष भूमिका म्हितादीगु खलकं जानकारी बिउगु दु ।