
रासस – कोरोना भाइरसया जोखिम जुइमबीत उत्तरपूर्वी भेगया प्यंगू नगरपालिकां नाकाय् थप कडाइ यासें स्वनिगः दुहावयेत प्रतिबन्ध तयाबिउगु दु ।
थुगु लागाया बुढानीलकण्ट, गोकर्णेश्वर, कागेश्वरी मनोहरा व शंड्खरापुर नगरपालिका क्षेत्रय् स्थानीय ल्याम्हत हे खटे जुयाः पिनं वइपिंत पनेगु शुरु याःगु दु । बुढानीलकण्ठ नगरपालिकाया शिवपुरी नागार्जुन राष्ट्रिय निकुञ्जपाखें नुवाकोट व सिन्धुपाल्चोक न्यासिवनेगु याइ । थ्व लँपुइ सवारी चले यायेगु पूर्वाधार मदुगुलिं नं न्यासिवनीपिं मनूत दुइ ।
नगर प्रमुख उद्धवप्रसाद खरेलं थुगु नाका वयेत निकुञ्जया सुरक्षार्थ खटे जुयाच्वंपिं नेपाली सेनां हे कडाइ याःगु जानकारी बियादिल । उगु नाका स्वयां बहनी बहनी तराईपाखें वइपिनि कारणं नगरवासीयाके त्रास ब्वलंगु धयादिल ।
‘म्हिग बहनी जक लहानं बिरामी वयेवं स्थानीवासीतयके त्रास ब्वलन, क्वारेन्टाइनय् व्यवस्थित रुपं तयेगु व्यवस्था तकं मदुगुलिं छेँय् च्वनेत धाःगु दु । स्वन्हुया दुने तराईपाखें बहनी बहनी वइपिनि ल्याः नगरपालिकाय् १००म्ह थ्यनेधुंकूगु दु,’ वय्कलं धयादिल ।
गोकर्णेश्वरपाखें नं निकुञ्जया हे लँपुया सिन्धुपाल्चोक व नुवाकोट वनेगु लँ दु । गोकर्णेश्वरपाखे धाःसा निगूलिं जिल्ला वनेगु सतक तकं दुगुलिं नेपाली सेनां हे आवतवापतय् कडा याःगु नगरपालिकाया प्रवक्ता मनोजकुमार ढुंगानां जानकारी बियादिल ।
नगरपालिकाया वडा नं १ स्थित निकुञ्ज दुनेया मूलखर्क, ओखरेनी, चिलाउने लगायत बस्तीया मनूतय्त पास बिया जक आवतजावतया व्यवस्था याःगु नगरपालिकां धाःगु दु । पिने जिल्लां वइपिंत धाःसा स्थानीय ल्याम्हतय्सं प्रवेश निषेध याःगु दु ।
कागेश्वरी मनोहरा नगरपालिकाया निकुञ्ज क्षेत्रपाखें नं निगू जिल्लाया मनूत न्यासिवयेफइगु लँ दु । थ्व लँपुइ नं सेनां कडाइ यायेत्यंगु दु ।
सिन्धुपाल्चोक व काभ्रेपलाञ्चोक दुहांवनेगु निगू नाका दुगु शङ्खरापुर नगरपालिकां निथाय्सं कडाइ याःगु दु । नगरपालिकाया वडा नं ३ जहरसिंहपौवाय् थौं सुथय् निसें ल्याम्हत, सुरक्षाकर्मी व स्वास्थ्यकर्मीतय्सं मंकाः कथं न्यासिवइपिंत पनेगु ज्या याःगु खः ।
वडाध्यक्ष सन्तबहादुर वाइवा स्वतःस्फूर्त रुपं स्थानीय ल्याम्हत सक्रिय जुयाः जनप्रतिनिधिया दबाबय् तकं मनूतय्त दुहांवयेमबीगु कथं निगरानी यानाच्वंगु धयादी । स्थानीय ल्याम्हतय्सं जहरसिंहं निसें सक्वः वनेगु वडा नं १, २ व ३य् मनूतय्त तकं प्रतिबन्ध तःगु दु ।
अथेहे नगरपालिकाया वडा नं ५या कात्तिक नाकापाखें काभ्रेपलाञ्चोक व सिन्धुपाल्चोक दुहांवनेत प्रतिबन्ध तःगु खँ अध्यक्ष शेरगम्भीर थापां धयादिल । न्हिनय् स्थानीयवासी ल्याम्हतय् सक्रियताय् दुहांवयेत पनेगु ज्या जूगु खःसां बहनी न्यासिवइपिनि कारणं समस्या जूगु वय्कलं धयादी ।
स्वनिगः पिने नं दुहांवःपिं स्वम्हेसित मंगलवाः कोरोना खनेदयेवं थनिंनिसें फुक्क नाकाय् कडाइ याःगु दु ।
राससया निंतिं पूर्णप्रसाद मिश्रया रिपाेर्ट
LEAVE YOUR COMMENTS