आः राजपा सरकारय् वनी ला ?

येँ – राष्ट्रिय जनता पार्टीं न्हापांनिसें माग याना वः कथं उगु पार्टीया सांसद रेशम चौधरीयात शपथ ग्रहण याकेगु ज्या सरकारं यात । थःपिंसं धाःगु माग सरकारं पूरा याना बिउगुलिं आः राजपा सरकारय् दुहां वनी लाकि ? राजनीतिक ख्यलय् थुकिया चर्चा दु । तर राजपाया वरिष्ठ नेतातय्सं धाःसा चौधरीयात शपथ ग्रहण याकेवं थःपिं सरकारय् दुहां वनेगु वातावरण अझं तयार मजूनिगु खँ धाःगु दु ।

सूत्रं धाः कथं राजपां चौधरीयात शपथ ग्रहण याकेमाः धकाः सरकारयात दबाब बिउगु खःसा सरकारं शपथ ग्रहण याकेगु ज्या याना बिल, तर त्वःतेगु ज्या धाःसा मयाः । उकिं राजपां चौधरीयात त्वःतेमाःगु व उकिया नापनापं लक्ष्मण थारू लगायत जेलय् कुना तःपिं मेपिं स्वंगू दर्जन थारूतय्त नं त्वःतेमाःगु माग न्ह्यःने तःगु दु ।

सरकारं टिकापुर घटनाय् ल्हाः दु धइगु द्वपं बियाः १३ दँ दुम्ह मचायात समेत ज्वनाः कुना तःगु दु । अथे हे सरकारं आः तक संविधान संशोधनया मुद्दा बारे छुं हे पलाः मन्ह्याकूगु कारणं नं राजपा तुरुन्त सरकारय् वनीगु सम्भावना मदुगु खँ सूत्रं धाःगु दु । वर्तमान सरकारयाके दुई तिहाइ बहुमत दुगु जुयाः यदि सरकारं चाहे जुल धाःसा तुरुन्त हे संविधान संशोधन यायेफु धासें सरकारं आः तक अज्याःगु चाहना तकं मक्यंगु खँय् राजपां आश्चर्य व्यक्त याःगु दु ।

संविधान संशोधन यायेगु हे एजेण्डा ज्वनाः छगू पार्टी सरकारय् वंगु उलिमछि दयेधुंकल तर नं सरकारं उकिया लागिं छुं पहल याःगु मदु, अय् जुयाः राजपा सरकारय् वनेवं जक संविधान संशोधन जुइ धाये फइ मखु धइगु विश्लेषण नं राजपा दुने जुयाच्वंगु दु । सरकारय् वनेगु खँय् पार्टी दुने निगू धार पिहां वयाच्वंगु खँ नं सूत्रं धाःगु दु ।