भाजु पुखूया प्रतिवेदन नपायात लःल्हात

ख्वप – थनया दूधपाटीइ च्वंगु ऐतिहासिक भाजु पुखू जिर्णोद्वार समितिं थःगु अध्ययन प्रतिवेदन ख्वप नगरपालिकायात लःल्हाःगु दु । ख्वप नगरपालिका वडा नं. १ स्थित दूधपाटीइ च्वंगु ऐतिहासिक भाजु पुखू उत्खनन् सम्बन्धी अध्ययन प्रतिवेदन नगरपालिकायात लःल्हाःगु खः । वंगु आइतवाः समितिया संयोजक प्रा. डा. पुरुषोत्तमलोचन श्रेष्ठं ख्वप नगरपालिकाया प्रमुख सुनील प्रजापतियात उगु प्रतिवेदन लःल्हानादीगु खः ।

झिंनिगूगु शताब्दीया निर्माण जूगु भाजु पुखूया लिपांगु प्रतिवेदन इतिहासविद, संरक्षणविद्, जनप्रतिनिधि, नगरपालिकाया शाखा प्रमुखनापं थीथी ख्यःया सरोकारवालाया रचनात्मक सुझाव व टिप्पणी दुथ्याकाः उगु प्रतिवेदन तयार यानागु समितिया संयोजक प्रा. डा. श्रेष्ठं कनादिल । ‘थीथी कालखण्डय् संरक्षण व पुनःनिर्माणया ज्या जुया वयाच्वंगु अध्ययनं खने दुगु व अध्ययनं ख्वपया इतिहासबारे महत्वपूर्ण पक्ष सीके फुगु दु’ संयोजक श्रेष्ठं कनादिल ।

भाजु पुखू येँया रानीपुखू स्वयां नं ५०० दँ पुलांगु व पुखूया मध्यभागय् शिखरशैलीया देगः जलेशवरया मूर्ति जूगु नं अधययनं पुष्टि जूगु वय्कलं धयादिल ।
प्रतिवेदन लःल्हाना कासें नगर प्रमुख प्रजापतिं इतिहासलिसे स्वानाच्वंगु सम्पदाया अध्ययन व अनुसन्धान न्हू पुस्ताया निंतिं ज्ञानया स्रोत जुइगु नापं सांस्कृतिक सम्पदाया ऐतिहासिक प्रमाण संकलनया निंतिं आवश्यक जूगु विचाः प्वंकादिल ।

लिसें वय्कलं ख्वप नगरपालिका सम्पदा संरक्षणय् न्ह्याः वनाच्वंगु दु धासें उकिया प्रमाण बीत नं सफल जुया वनाच्वंगु प्रमुख प्रजापतिं धयादिल । वंगु साउन २९ गते च्वंगु ख्वप नगरपालिकाया बोर्ड बैडकं प्रा. डा. श्रेष्ठया संयोजकत्वय् ख्वपया दरवार हेरचाह व स्मारक संरक्षण ज्याकूया प्रमुख मोहनसिं लामा, राष्ट्रिय कला संग्रहालयया प्रमुख सरस्वति सिंह, इतिहासविद् प्रा. विश्वमोहन जोशी, सम्पदा शाखाया सूर्यभक्त खर्बुजा, नगरपालिकाया सम्पदा शाखा प्रमुख ई. रामगोविन्द श्रेष्ठ दुथ्याःगु छगू अध्ययन समिति गठन याःगु खः ।