भ्रष्टाचारया सिक्वेल

संकिपा ख्यलय् थौंकन्हय् सिक्वेल दयकेगु चलन अप्वयाच्वंगु दु । संकिपाया सिक्वेल दयेकू थें झीथाय् देशय् भ्रष्टाचारया नं सिक्वेल बने जुयाच्वन धाःसां जिउ । देय्या राष्ट्रिय ध्वजावाहक नेपाल वायुसेवा निगमया श्रृंखलावद्ध भ्रष्टाचारया बाखं प्रचार जुयाच्वंगु दु । टेलिभिजनय् टेलि प्याखंया सिरियल प्रशारण जुयाच्वं थें नेवानिया नं श्रृंखला कथं भ्रष्टाचारया समाचारत पिहां वयाच्वंगु दु ।

नेवानिया लाउडा काण्ड, धमिजा काण्ड, चेज एअर काण्ड, साउथ चाइना काण्ड एअरबस काण्ड लिपा आः वाइडबडी काण्डया श्रृंखला शुरु जुयाच्वंगु दु । लिपांगु इलय् पिदंगु श्रृंखलाय् निगः वाइडबडी जहाज न्याना काःगुली ४ अर्ब ३५ करोड दांया भ्रष्टाचार जुल धइगु खँ पिहां वयाच्वन ।

संसदया सार्वजनिक लेखा समितिं थ्व छगू तःधंगु हे भ्रष्टाचार खः अले थुकिया योजनाकार नेवानिया महाप्रबन्धक सुगतरत्न कंसाकार खः धकाः प्रचार यानाच्वंगु दु ।न्ह्यसः लेखाया थ्वहे प्रचारय् दु । धाथें महाप्रबन्धक कंसाकार जक थ्वया योजनाकार खः ला ः छम्ह कर्मचारी महाप्रबन्धकं जक थपाय्धंगु भ्रष्टाचार यायेगु आँट याइला ?

गनं महाप्रबन्धक कसाकारयात मूहाःम्ह दुगुचा जकं दयेकेत्यंगु मखुला ? थ्वया मुख्यपिं योजनाकारत खिउँगु क्वथाय् जकं सुलाच्वंगु मदुला ? राजनैतिक नेतृत्वया ग्वाहालि मदयेक थपामछिधंगु भ्रष्टाचार छम्ह महाप्रबन्धकं जक याइ ला ? पत्याः याये थाकु । अथेला अख्तियार दुरुपयोग निवारण आयोगं छानबिन यानाः सत्य तथ्य ला न्ह्यःने हइ हे तिनि जुइ ।

छाय्धाःसां थज्याःगु अर्बौं अर्ब तकाया भ्रष्टाचारय् ह्वेल माछा नं अवश्य हे दइ । तर लाइबलय् धाःसा घौन्या व भुन्या जक लानाच्वंगु खनेदु । मालावं वन धाःसा थज्याःगु दसु यक्व हे खने दइ । ३३ किलो लँुया इलय् नं थथे हे जूगु खः । उकिं नेवानिया वाइडबडी भ्रष्टाचार बारे नं सत्य तथ्य खँ नेवानिया महाप्रबन्धक कंसाकारं न्ह्यःने हयाः थुकी संलग्न फुकसित आम नागरिकया न्ह्यने क्यनेमाः ।

कसाकारं थ्व आँट याइ ला ? देशय् २०४६ सालया जनआन्दोलन लिपा बहदलीय प्रजातन्त्र पलिस्था जुइवं सरकारी स्वमित्वया सार्वजनिक संस्थानया दुर्गति शुरु जूगु खः धाःसां जिउ । २०४६ साल न्ह्यः फाइदाय् वनाच्वंगु अप्वः धइथें सार्वजनिक संस्थानत २०४६ सालया परिवर्तन लिपा दुर्गतिइ वनेगु शुरु जुल ।

बिगतय् लाउडा काण्ड, धमिजा
काण्ड, एअरबस काण्ड, चेज एअर काण्ड, साउथ चाइना काण्ड, व आःया वाइड बडी भ्रष्टाचार काण्डय् नेवानिइ राजनीतिक नियुक्ति यानाः नेवानिया दुर्गति जुयाच्वंगु खः । निजी ख्यःया एअर लाइन्सतय्सं झन्झन् प्रगति यानाच्वनसा नेवानि जक गय दुर्गति जुयाच्वन ले ?

सार्वजनिक संस्थानय् राजनीति दुहां वनाः हस्तक्षेप यायेवं फुक्क हे संस्थानत धमाधम घाटाय् वनेगु शुरु जुल । सार्वजनिक संस्थानय् योग्यता व स्वस्थ प्रतिस्पर्धाया आधारय् पदाधिकारीत ल्ययेगु ज्या मयासे राजनीतिक आस्थाया आधारय् पार्टीया आसेपासेयात नियुक्ति यायेगु प्रचलन विकास यायेवं फाइदाय् वनाच्वंगु सार्वजनिक संस्थानत नं धमाधम स्यना वंगु खः ।

अझ गुलिखे संस्थानय् ला आर्थिक काल–बिलया आधारय् तकं प्रमुख नियुक्त यात धइगु खँ नं पिहां वःगु दु । गथे कि अष्ट्रेलियाया लागिं राजदूत जुयादीम्ह लक्की शेर्पां थःत राजदूत याकेगु लागिं केपी ओलीयात ३ करोड दां बिल धइगु नं चर्चा पिहां वल । छुं ई न्ह्यः तक देशय् गुला गुलाय् हे सरकार हिलीग प्रवृत्तिया कारणं नं सार्वजनिक संस्थानय् भ्रष्टाचार अप्वया वंगु खँ धायेगु याः ।

सरकार हिलेवं उकिया नापनापं संस्थानया जीएमत नं हिलेगु प्रचलनं यानाः नं संस्थानय् भ्रष्टाचार अप्वयाः सस्थानतय्सं प्रगति याये मफयावंगु खः । थुकथं संस्थानत घाटाय् वन धकाः संस्थानतय्त निजीकरण यायेगु नामय सिन्केया भावं मीगु ज्या याना बिल । अथे हे गुलिखे संस्थानत ला राजनीतिक खिंचातानीया कारणं बन्द हे यायेमाःगु तकं अवस्था पिहां वल ।

अथे खःसां आः देशय् दुई तिहाइया शक्तिशाली सरकार दुगुलिं सार्व जनिक संस्थानत चायेकाः नागरिकतय्त लजगाः चूलाके बीगु बारे बिचाः यायेमाःगु खः । तर मयासे सरकारं ४ अर्ब तका खर्च यानाः धरहरा दयेकेगु, डेढ अर्ब खर्च यानाः मोनोरेल चले यायेगु, प्रधानमन्त्रीया गृह जिल्लाय् अर्बौं खर्च यानाः भ्यु टावर दयेकेगुली लगे जुयाच्वन ।

बिकट जिल्लाय् विद्यार्थीत तुइनं यात्रा याये मालाच्वंगु दु तर सरकारया धाःसा ४ अर्ब खर्च यानाः धरहरा दयेकेगुली तक्यनाच्वन तर यँया नागरिकतय् लः त्वने मखं । मेलम्ची याकनं हयेगु ला गन गन सरकार धाःसा खर्बौं खर्च यानाः पानीचहाज चले यायेगुली व्यस्त जुयाच्वन । तुइन बिस्थापित यायेगु व मेलम्चीया लः याकनं हयेगु तःधं कि धरहरा व पानीजहाज चले यायेगु तःधं ?

प्रधानमन्त्रीया प्राथमिकता गन ? सार्वजनिक संस्थान डुबे जूगु सार्वजनिक संस्थानय् भ्रष्टाचार अप्वःगु कारण धइगु अन जुइगु राजनीतिक हस्तक्षेप खः । संस्थानय् राजनीतिक नियुक्ति यानाः संस्थानय् भ्रष्टाचार अप्वया वःगु आम नागरिकतय् धापू खः । राजनीतिक नियुक्तिया आडय् अन ततःधंगु भ्रष्टाचार जुइगु याः ।

नेवानिया वाइड बडीया भ्रष्टाचार अनया न्हापांगु भ्रष्टाचार धाःसा मखु । थ्व स्वयां न्ह्यः नं नेवानि श्रृंखलाबद्ध कथं भ्रष्टाचार जुया वयाच्वंगु
खनेदु । बिगतय् लाउडा काण्ड, धमिजा काण्ड, एअरबस काण्ड, चेज एअर काण्ड, साउथ चाइना काण्ड, व आःया वाइड बडी भ्रष्टाचार काण्डय् नेवानिइ राजनीतिक नियुक्ति यानाः नेवानिया दुर्गति जुयाच्वंगु खः ।

निजी ख्यःया एअर लाइन्सतय्सं झन्झन् प्रगति यानाच्वनसा नेवानि जक गय दुर्गति जुयाच्वन ले ? दुई तिहाइया शक्तिशाली स्थायी सरकारया प्रधानमन्त्री केपी ओली थम्हं न भ्रष्टाचार याये मखु, मेपिंत नं याके बी मखु धकाः भाषण यानाच्वंसा व खँ भाषणय् जक सीमित जुयाच्वन । भाषणं पिहां वयाः कार्यान्वयनय् वयेफुगु मदुनि ।

सम्बन्धित बुखँ

LEAVE YOUR COMMENTS