पचलि भैरव संरक्षणया गुरुयोजना कार्यान्वयन

येँ – पचलि भैरव परिसरय् निगू फल्चा पुनःनिर्माणया निंतिं शिलान्यास याःगु दु । येँ महानगरपालिकाया प्रमुख विद्यासुन्दर शाक्यं वंगु बुधवाः फल्चा पुनःनिर्माणया निंतिं शिलान्यास यानादीगु खः ।

शिलान्यास लिपा जूगु ज्याझ्वलय् नवासें येँ महानगर प्रमुख शाक्यं पचलि भैरव संरक्षणया निंतिं गुरुयोजना कार्यान्वयन यायेगु ज्या न्ह्यायेधुंकूगु दु धयादिल । थः महानगरपाकिलाया जनप्रतिनिधिया रुपय् निर्वाचित जुया वयेधुंकाः सम्पदा मर्मत, सम्भार व पुनःनिर्माणलिसें संरक्षण, संवद्र्धन, प्रवद्र्धन यायेगु नापं पर्यटनलिसे नं स्वाना यंकेगु नीतियात प्राथमिकताय् तयाः ज्या न्ह्याकागु वय्कलं कनादिल ।

येँ महानगरपालिकाया १२ वडा छगू सांस्कृतिक वडा जूगु धासें येँ महानगर प्रमुख शाक्यं पचलि भैरव संरक्षणया निंतिं दयेकागु गुरुयोजनाय् सकसिनं अपनत्व महसुस याये फइकथं थुगु ख्यःलिसे सम्बन्धित गुथ्याः व सरोकारवाललिसे सहलह यायेगु ज्या छुं भचा लिज्याः वंगु खः धयादिल ।

वय्कलं थःपिंसं पुनःनिर्माणया निंतिं न्ह्याकागु गुलि नं सम्पदात दु व दक्व समुदायया खः धासें व हे समुदाययात संचालन व व्यवस्थापनया निंतिं जिम्मा नं बीगु जुइ धयादिल । आः नं थ्व हे नीतिकथं ज्या जुयाच्वंगु धासें वय्कलं थ्व हे थःपिनिगु अभियान नं जूगु वय्कलं धयादिल ।

पचलि भैरवया फल्चा शिलान्यास यायेगु ज्या लिपा पचलि भैरवया गुरुयोजना नं कार्यान्वयनया चरणय् वंगु अनुभूति थम्हं यानागु प्रमुख शाक्यया धापू दु ।
महानगरपालिकां मूर्त सम्पदानापं अमूर्त सम्पदाया नं अभिलेखीकरण यायेगु व सांस्कृतिक, सामाजिक चालचलनयात प्रवद्र्धन, संवद्र्धन यायेगु, परम्परागत लोक बाजं, प्याखंया संरक्षण, संवद्र्धन व प्रवद्र्धन यायेगु सम्बन्धित गुथिया गुथ्याःतलिसे सहकार्य याना वयाच्वनागु वय्कलं धयादिल ।

नमोबुद्ध बिल्डर्सं ८९ गू लख न्यय्न्याद्वः तका लागतय् पुनःनिर्माण यायेत्यंगु फल्चा वइगु जेठतकया दुने पुनःनिर्माण सिधयेकेगु लक्ष्य कयातःगु दु ।

सम्बन्धित बुखँ

LEAVE YOUR COMMENTS