शंखधर संग्रहालय चायेकेगु तयारी

थिमि (नेपालभाषा टाइम्स) – नेपाल संवत्या प्रणेता राष्ट्रिय विभूति शंखधर साख्वाः संग्रहालय दयेकेगु तयारी शुरु जूगु दु। मध्यपुर थिमिइ दयेकेत्यंगु उगु संग्रहालययात कयाः वंगु वालय् सरोकारवालातय् छगू सहलह जूगु खः ।

शंखधर साख्वाः संग्रहालय दयेकेत राष्ट्रिय विभूति शंखधर साख्वाः प्रतिष्ठानया ग्वसालय् मध्यपुर थिमि नगरपालिकाया प्रमुख मदनसुन्दर श्रेष्ठलिसें संग्रहालय विज्ञ व सल्लाहकारसहितया बैठक च्वंगु खः । प्रतिष्ठानं मध्यपुर थिमिइ दयेकाच्वंगु थःगु हे भवनय् संग्रहालय चायेकेगु तयारी जुयाच्वंगु दु। प्रतिष्ठानं थिमिया शंखधर चोकय् दयेकाच्वंगु प्यतँ जाःगु भवनय् संग्रहालय दयेकेगु खः ।

उगु संग्रहालयय् नेपाल संवत्या प्रणेता शंखधर व नेपाल संवत्लिसे सम्बन्धित थीथी ऐतिहासिक अभिलेख, दस्तावेज, वस्तु संकलन यानाः संग्रहालय दयेकेगु तयारी जुयाच्वंगु प्रतिष्ठानया उपाध्यक्ष ज्ञानराम श्रेष्ठं कनादिल । मध्यपुर थिमि नगरपालिकां निर्माण यानाच्वंगु शंखधर पार्कय् नं शंखधर सम्बन्धी थीथी कला व मूर्ति स्थापना याये लक्ष्य कयातःगु नं वय्कलं जानकारी बियादिल ।