संक्रमित अप्वयेवं शैक्षिक क्षेत्र भद्रगोल

येँ – कोरोना महामारी व उकियात पनेत सरकारं लागू यानातःगु लकडाउनं यानाः देय्या शिक्षा क्षेत्र दकलय् भद्रगोल जूगु दु । थौंकन्हय् स्कूल तह व उच्च शिक्षा तहया परीक्षा सञ्चालन यायेगु ज्याझ्वःत न्ह्यानाच्वंगु दु । तर न्हियान्हिथं हानं कोरोनाया महामारी अप्वया वनाच्वंगु कारणं अज्याःगु परीक्षा कायेगु सम्भावना मदया वनाच्वंगु दु । थुकिं यानाः परीक्षा कायेगु लाकि मकायेगु धकाः त्रिवि लगायतया शिक्षण संस्थात अन्यौलग्रस्त जुयाच्वंगु दु ।

थ्वहे झ्वलय् म्हिगः तिनि त्रिविविं आः तक जाँच कायेगु धकाः रुटिन सार्वजनिक यायेधुंकूगु छुं नं परीक्षा रोके मयायेगु धकाः निर्णय याःगु दु । त्रिविविया स्नातक व स्नातकोत्तर तहया गुलिखे संकायया जाँच साउन २६ गतेनिसें सञ्चालन जुइगु जुयाच्वंगु दु । आः अथे रुटिन हे पिकायेधुंकूगु सेमेस्टर प्रणालीया भदौ ५ गते तकया परीक्षा मदिकेगु खँ धाःगु दु । थुकी मध्ये आः गुगुं हे जाँच मदिकुसे सञ्चालन यायेगु निर्णय त्रिविविं याःगु खः ।

थ्व फुक्क जाँच भौतिक रुपं हे कायेगु व उकिया लागिं कडा रुपं स्वास्थ्य मापदण्ड पालना यायेगु तयारी यानाच्वंगु खँ नं धाःगु दु । सेमेस्टर प्रणालीइ यक्व विद्यार्थी मदइगु जूगुलिं उमित भौतिक दुरी कायम यानाः जाँच कायेत थाकु मजुइगु खँ धाःगु दु ।

थ्वहे झ्वलय् कक्षा १२ या जाँच कायेगु धकाः रुटिन हे पिकाःसां नं कोरोना महामारी अप्वया वनेवं स्थगित यायेगु धकाः सरकारं निर्णय याःगु दु । एसईईया जाँचया रिजल्ट नं जाँच हे मकासे पिकायेधुंकूगु दु । थुकी विद्यालयतय्सं विद्यार्थीयात अप्वः अप्वः नम्बर बिल धकाः विरोध नं वयाच्वंगु दु ।