सरकार न्ह्यः हे पार्टी एकता यायेत थौं गहन बैठक

येँ – एमाले–माओवादी एकताया निंतिं थौं एकता संयोजन समितिया बैठक च्वनेत्यंगु दु । म्हिगः माओवादी अध्यक्ष पुष्पकमल दाहाल व एमाले अध्यक्ष केपी ओली दथुइ ‘वान टु वान’ वार्ता लिपा थौं एकता संयोजन समितिया बैठक च्वनेत्यंगु खः । म्हिगः निम्ह अध्यक्षया दथुइ राष्ट्रिय सभा निर्वाचनया लिच्वः बारे समेत खँ जूगु खः । राष्ट्रिय सभाया चुनाव क्वचायेधुंकूगुलिं सरकार गठनया निंतिं प्रक्रिया न्ह्याकेमाःगु खँय् अध्यक्ष ओली न्ह्याः वनाच्वंगु दुसा माओवादीं सरकार गठन लिसें पार्टी एकता सुनिश्चित जुइमाःगु खँय् बः बियाच्वंगु दु । तत्काल पार्टी एकता जुइ मफइगु अवस्था वल धाःसा माओवादी सरकारय् मवँसे एमालेयात समर्थन यानाः पिने हे च्वनेगु कथं तयारी यानाच्वंगु खँ सीदुगु दु ।