विशाखापटनमय् रसायनिक प्लान्टं ग्यास लिक, ९म्ह सित

येँ – भारतया आन्ध्र प्रदेशया विशाखापटनमया छगू रसायनिक प्लान्टं ग्यास लिक जुया ९म्ह सीगु दु । बिहीवाः सुथय् ग्यास लिक जुयाः ३००–४००या ल्याखय् मनूतय्त अस्पताल भर्ना याःगु दु । रसायनिक प्लान्ट नापसं च्वंगु गांया १५००म्ह मनूतय्त सुरक्षित स्थानय् यंकूगु दु ।

विशाखापटनमया कमिस्नरं बिहीवाः सुथय् अनया स्थानीयत द्यनाच्वंगु इलय् प्लान्टं ग्यास लिक जूगु खँ धयादीगु दु । भारतय् लकडाउनयात छ्वालुकेधुकंकाः छुं दिं न्ह्यः जक थुगु प्लान्ट हानं संचालनय् वःगु खः ।

प्लान्टया आधिकरिक कम्पनी एलजी केमिकल लिमिडेटं आः ग्यास नियन्त्रणय् वयेधुंकूगु जानकारी बिउगु खः । तर कम्पनीं ग्यास लिकया कारणं अझ नं सीमदुगु व उकीया बारे छानबिन जुयाच्वंगु धाःगु दु ।