भिक्षु धम्मपाल महास्थविरया अन्त्येष्टि

येँ – वंगु शनिवाः मदुम्ह भिक्षु धम्मपाल महास्थविरया अन्त्येष्टि थौं याःगु दु । वसपोलया सीम्हयात थौं यलया शाक्यसिंह विहारं सिथं यंकाः शंखमूल घाटय् थेरवादी बौद्ध परम्पराकथं अन्त्येष्टि याःगु खः । वसपोल शाक्यसिंह विहारया प्रमुख नं खः ।

अखिल नेपाल भिक्षु महासंघया व्यवस्थापनय् जूगु अन्त्येष्टिइ वसपोलया सीम्हय् भिक्षुपिंसं मंकाः कथं मि तयाबिज्याःगु खः ।

वसपोलया अन्त्येष्टिया इलय् वय्कःया सीम्ह थीथी नेतात लिसें श्रीलंका, म्यानमार, थाइल्यान्डया राजदूतपिंसं श्रद्धाञ्जली देछायादीगु खः । वसपोलया अन्त्येष्टिइ ब्वति कायेत थाइल्यान्डं विशिष्ट भिक्षुपिं नं बिज्याःगु खः ।

अन्त्येष्टिया इलय् नेपाल भिक्षु महासंघया अध्यक्ष भिक्षु मैत्रेय महास्थविर, महासचिव भिक्षु कौण्डन्य महास्थवीर, चारुमति बुद्ध विहारया प्रमुख भिक्षु तपस्सी महास्थवीरपिंसं महापरित्राण पाठ यानाबिज्याःगु खः ।

थाइल्यान्ड सरकारं ‘च्रखु’ पदं विभूषित यानातःम्ह वसपोल न्यागू दशक न्ह्यवनिसें बौद्ध साहित्य प्रचारप्रसारय् न्ह्यलुवाः जुयाबिज्यानाच्वंम्ह खः । वसपोल ६२ दँया वैशय् क्यान्सर ल्वचं मदुगु खः ।