किपूया ऐतिहासिक देय् पःखाः हानं दना हइगु

किपू – किपूया इतिहासय् उल्लेख जुयाच्वंगु ऐतिहासिक देय् पःखाः (गःपःखाः) आः हानं पुनःनिर्माण याइगु जूगु दु । किपू नगरपालिकालिसे जानाः किपूया स्थानीय जनतां हे थुकिया निर्माण यायेगु सहमति जूगु दु । गोर्खाली जुजु पृथ्वी नारायण शाह निक्वः तक किपुली पराजित जूगुया कारण देय् पखालं दुहां वये मफयाः खः । किपूया सुरक्षार्थ मल्लकालय् दयेकातःगु थ्यंमथ्यं ४ फिट ब्या दुगु थ्व पःखालं किपू देय् हे चाःहिलाच्वंगु दु ।

देय् पःखाः ऐतिहासिक नापं पर्यटनया दृष्टिकोणं नं महत्वपूर्ण जुइगु खँ विज्ञतय्सं धाःगु दु ।देय् पःखाः नापं दुगु गुलिखे ध्वाखात नं आः मदयेधुंकूगु दुसा आः पःखाःया नापनापं अज्याःगु ध्वाखात नं दयेका यंकेमाःगु बिचाः किपूया स्थानीय जनप्रतिनिधि व विज्ञतय्सं तयाच्वंगु दु । थुुगु विषयय् नेवाः एफ एम अनक मिडिया प्रालिया ग्वसालय् शनिवाः जूगु सहलह मुँज्याय् नं आपालं विज्ञतय्सं सुझाव बिउगु खः ।

ज्याझ्वलय् किपू नगरपालिकाया मेयर रमेश महर्जनं किपूया देय् पःखाः गुकथं फु उकथं दयेकेत थः तयार दु धासें उकिया निंतिं हे कार्यदल दयेकाः अध्ययन याकागु जानकारी बियादिल । देय् पःखाः बारे अध्ययन यायेत दयेकूगु कार्यदलया कजि अनुज प्रधानं प्रतिवेदन तयार जुइधुंकूगु खँ कनादिलसा किपू नपा वडा नं. २ या अध्यक्ष रमेशमान डंगोल, वडा १० या अध्यक्ष अमन महर्जनपिंसं थःथःपिनिगु वडाय् दुगु देय् पःखःयात पुनःनिर्माण चरणबद्ध रुपं याना वनेत तयार दु धयादिल ।

नेवाः एफ एम अनक मिडिया प्रालिया नायः नविन महर्जनया सभापतित्वय् जूगु उगु मुँज्याय् नेवाः एफएमया प्रवन्ध निर्देशक श्रीकृष्ण महर्जनं लसकुस यासें देय् पःखाः किपूया हरेक दृष्टिकोणं महत्वपूर्ण जूगुलिं गुकथं फइ उकथं चरणबद्ध रुपं ज्या याना वनेमाः धयादिल ।

नेपालभाषा एकेदेमि न्यामासिमाया भवनय् जूगु उगु सहलह मुँज्याय् प्रा.डा. शिवशरण महर्जन, प्रा.डा. तुयुबहादुर महर्जन, टिकाराम महर्जन, रविन्द्र बहादुर प्रधान, ज्ञानबहादुर द्यःला, केशरत्न बज्राचार्य, बुद्धिलाल ज्यापु, वीर बहादुर महर्जन, विजय महर्जन, कमलेश महर्जन, ज्ञानबहादुर महर्जन, राजमान महर्जन लगायतपिंसं देय् पःखाःया महत्व बारे कनादीगु खः ।