मर्यादाक्रम संशोधन जुइगु
यक्व आलोचना वःगुलिं मर्यादाक्रम राजपत्रय् मवःनि
येँ- थनिं लछि न्ह्यः सरकारं सार्वजनिक याःगु मर्यादाक्रमय् यक्व थासं असन्तुष्टि व विरोध वःगुलिं आः उकियात संशोधन यानाः जक प्रकाशित यायेगु निष्कर्षय् सरकार थ्यंगु खँ सीदुगु दु । थनिं लछि न्ह्यः सरकारया प्रवक्ता लिसें सञ्चारमन्त्री गोकुल बास्कोटां राष्ट्रपतिंनिसें शाखा अधिकृत तकया मर्यादाक्रम सार्वजनिक यानादीगु खः ।
तर मर्यादाक्रमया उगु धलः सार्वजनिक जुइसातकि यक्व थासं उकिया विरोध जुइवं सरकारं उकियात राजपत्रय् छापे मयासे तयातःगु खः । राजत्रपय् छापे जुइवं आधिकारिक जुइगु जुयाः सरकारं उकियात अथें थाका तःगु खः । न्हूगु मर्यादाक्रम राजपत्रय् मवःगु जुयाः सरकारी निकायतय्सं पुलांगु हे मर्यादाक्रमं ज्या चले यानाच्वंगु दु ।
पुलांगु मर्यादाक्रम नं यक्व कथं त्रुटिपूर्ण खने दुगु जुयाः उकियात हीकाः न्हूगु मर्यादाक्रम दयेकूगु खः । तर थुकी नं यक्व क्रम त्रुटिपूर्ण खने दत धासें आपालं थासं असन्तुष्टि प्वंका हयेवं सरकारं उकियात आधिकारिक रूप मबिसे तयातःगु खः ।
सरकारं सार्वजनिक याःगु न्हूगु मर्यादाक्रमय् खास यानाः निर्वाचन आयोग, लोकसेवा आयोग थेंज्याःगु संवैधानिक निकायया प्रमुख आयुक्त स्वयां नं सरकारया मुख्य सचिवयात च्वय् तयातल धकाः सम्बद्ध आयोगया प्रमुखतय्सं सार्वजनिक रूपं हे असन्तुष्टि प्वंका हःगु खः ।
अथे हे सरकारं न्हूगु दयेकूगु शान्ति सुरक्षा ऐनय् जिल्लाया सीडीओयात प्रशस्त अधिकार बियातःसां मर्यादा–क्रमय् धाःसा वयात गाउँपालिका प्रमुख स्वयां नं क्वय् तयातःगु खँय् नं यक्वं असन्तुष्टि पिदनाच्वंगु खः ।
अथे हे गुलिखे जनप्रतिनिधितय्सं नं थःपिंसं हे आदेश बीमाःपिं गुलिखे कर्मचारीयात थः स्वयां च्वय् तयातःगुलिं पिहां वनेत हे मछाःसे च्वन धकाः नं प्रतिक्रिया बीगु याना हःगु खः । न्हूगु मर्यादाक्रमय् राजधानी जूगुलिं येँ महानगरपालिकाया मेयरयात विशिष्ट स्थान बियातःगु खः ।
छापे जूगु जूसा कडा विरोध
सरकारं सार्वजनिक याःगु न्हूगु मर्यादाक्रम यदि राजपत्रय् छापे यानाः आधिकारिक रुपं पिहां वःगु जूसा उकिया तःधंक हे विरोध जुइगु खँ धाःगु दु । राजपत्रय् छापे मजूनिगु जुयाः जक थीथी निकायया प्रमुखत सुम्क च्वनाच्वंगु खँ सूत्रं धाःगु दु । उमिसं प्रचलित कानून, चले जुया वयाच्वंगु परम्परा व पदाधिकारीया नियुक्ति प्रक्रियायात ध्यान हे मतसे थ्व मर्यादाक्रम तयार याःगु द्वपं बिउगु दु । आः सरकारं हानं छक्वः व्यापक सल्लाह यानाः थुकियात संशोधन सहित छापे याकेगु तयारी यानाच्वंगु खँ सीदुगु दु ।
LEAVE YOUR COMMENTS