शाक्य निमित्त कार्यकारी नियुक्त

येँ (नेपालभाषा टाइम्स) – नेपाल विद्युत प्राधिकरणया निमित्त कार्यकारी निर्देशकय् हितेन्द्रदेव शाक्ययात नियुक्त याःगु दु। ऊर्जा मन्त्रालयं मेगु व्यवस्था मजूतलेया निंतिं शाक्ययात निमित्त प्रमुख नियुक्त याःगु खः । वय्कः प्राधिकरणया हे एनईए इन्जिनियरिङ कम्पनीइ प्रबन्ध निर्देशक कथं ज्या यानाच्वम्ह खःसा वय्कःयात अनं ‘काजफिर्ता’ यानाः प्राधिकरणया निमित्त कार्यकारी निर्देशकय् हःगु खः । वय्कलं म्हिगः हे पदबहाली नं यानादी धुंकूगु दु ।

प्राधिकरणया कार्यकारी निर्देशक कुलमान घिसिङ नियमित अवकाशय् वनेधुंकाः लेखनाथ कोइरालायात निमित्त बियातःगु खःसा आः वय्कःयात केन्द्रीय ज्याकुथिइ हाजिर याकाः शाक्ययात निमित्त बिउगु खः । कोइराला शाक्य स्वयां कनिष्ठम्ह उपनिर्देशक खःसां न्हापा कोइरालायात हे निमित्त कार्यकारी बिउगु खः । कोइराला निमित्त प्रमुख दयेकेवं शाक्य प्राधिकरण हे मवंसे च्वनाच्वंगु खःसा थः स्वयां कनिष्ठम्ह पदेन अध्यक्ष जुइगुलिं कम्पनीया संचालक समितिया बैठक नं मसतुसे च्वनाच्वंगु खः । पूर्वी इलामय् स्थायी छेँ जुयाच्वंम्ह शाक्य विद्युत प्रशारण लाईनया विज्ञ खः ।