हलि नेवाः न्हि कुन्हु अनलाइन सम्मेलन

येँ – स्वक्वःगु हलिनेवाः न्हि कुन्हु अनलाइन पाखें थीथी देशय् च्वनाच्वंपिं नेवाः न्ह्यलुवातय् दथुइ मुँज्या जुल । अमेरिकाया टेक्सासय् च्वंच्वनादीम्ह प्रमेश श्रेष्ठं न्ह्याकादीगु थुगु हलिं सम्मृलन स्वघौ स्वयाः अप्वः ई तक न्ह्याःगु खः । नेपाःया ई कथं शनिवाः बहनी १० बजे न्ह्याःगु सम्मेलन चान्हसिया १ बजे तक जूगु खः ।

सम्मेलनं थौंकन्हय् विश्वब्यापी रुपं न्यनाच्वंगु कोरोना भाइरस संक्रमण नियन्त्रणया निंतिं कोष दयेकेगु लिसें थीथी सहलह जूगु खः । हलिं नेवाः दबूया नायः सिजन श्रेष्ठं लसकुस न्वचु बियादीगु अनलाइन सम्मेलनय् हलियां थीथी थासं १७ म्हेसिनं ब्वति काःगु खः ।

अनलाइन सम्मेलनय् पोर्टल्यान्ड अमेरिकापाखें दया शाक्य, बेलायतपाखें कृष्ण चखुं, सिकागोपाखें केशरमान ताम्राकार, सिक्किमपाखें राजीव शंकर श्रेष्ठ, पोर्टल्यान्डपाखें प्रज्वल वज्राचार्य, दुबईपाखें प्रमोद श्रेष्ठ, क्यानाडां बिमल श्रेष्ठ, बेल्जियमं रजनी प्रधान व रविन प्रधान, हंगकंगं रचना प्रधान, बैंककं आशाजीत अवाले, नेपालं पुष्कर माथेमा, शाक्य सुरेन, क्यानडां नेवाः देय् दबूया नायः नरेश ताम्राकार, पोर्चुगलं गंगाबहादुर नेम्कुल, इजरायलं नरेशमान श्रेष्ठ, सिक्किमं रेशु प्रधानंपिं ब्वति कयादीगु खः ।

सम्मेलनय् हेलिं नेवाः दबूया २०१० निसें २०२० तकया गतिविधि, थुगुसीया हलिं नेवाः न्हि, सरकारं हाकनं हयेत्यंगु गुथि विधयेक व उकियात नेवाःतसें गुकथं कायेमाः धयागु बारे, वर्ल्ड  नेवाः अर्गनाइजेशन (हलिं नेवाः दबू)या भावि योजना बारे सहलह जूगु खः । सहलह लिपा कोभिड १९ यानिंतिं छगू कोष दयेकेगु नितिं हापं म्हयेगु ज्या नं जूगु खः ।

सम्बन्धित बुखँ

LEAVE YOUR COMMENTS