जि नेवाः, झी नेवाः पिदिन

येँ – नेपालभाषा नापं खस भाय्या म्येँ च्वमि आनन्द वज्राचार्यया ‘जि नेवाः, झी नेवाः’ नांया नेपालभाषाया न्हूगु म्येँचाः पिदंगु दु । वंगु शनिवाः थनया छत्रपाति पार्टी पालेसय् जूगु छगू ज्याझ्वःया दथुइ नांजाःम्ह म्येँ हालामि ‘गोल्डेन भ्वाइस अफ नेपाल’ प्रेमध्वज प्रधानं उगु म्येँचाः पित ब्वज्या यानादीगु खः ।

ज्याझ्वलय् विशेष पाहांकथं येँ क्षेत्र नं ७या प्रतिनिधिसभा सदस्य रामवीर मानन्धर झायादीगु खः । म्येँ च्वमि वज्राचार्यं लसकुस यानादीगु ज्याझ्वलय् मूपाहां प्रधानं न्हापा न्हापाया अनुपातय् थौंकन्हय् नेपालभाषाया म्येँ व म्येँचाःया ल्याः आपालं पिहां वयाच्वंगु लसताया खँ जूगु धयादिल ।

न्हापा म्येँ रिकर्ड यायेत नं तसकं थाकूगु खँ कनादिसें वय्कलं न्हापा न्हापा छपु म्येँ रेकर्ड यायेत नं भारतया कलकत्ता लगायत थीथी सहरय् वनेमाःगु बाध्यता दुगु खःसा थौंकन्हय स्वनिगलय् नं आपालं रेकर्डिङ स्टुडियो चाले धुंकूगु व आधुनिक प्रविधिया कारणं म्येँ हालीपिंत नं तसकं अःपुगु धयादिल ।

फक्व अप्वः म्येँ पिथनेमाःगु खँय् बः बियादिसें वय्कलं संख्यात्मक स्वयां गुणात्मक म्येँ पिथनेगु खँय् नं ध्यान बीत इनाप यानादिल ।
म्येँचालय् मनराजा नकःमि, हरिशरण साय्मि, राज सिं, विजेन श्रेष्ठ लगायतया संगीतय् जुजुकाजी रंजित, निशा देसार, सतिश महर्जन लगायतया कलाकारया सलय् झिंन्यापु म्येँ दुथ्यानाच्वंगु दु ।