२२ वडाया सम्पदा चित्र प्रदर्शन

नेपालभाषा टाइम्स

येँ (नेपालभाषा टाइम्स)/ येँ महानगरपालिका २२ वडाया आर्थिक ग्वाहालिइ सभ्यता नेपाःया पाखें जूगु ‘क्यान्भासमा २२ वडाका सम्पदाहरू’ शीर्षकया चित्रकला कार्यशालाय् च्वःगु चित्रत प्रदर्शनी जूगु दु । शनिवाः येँया सुन्धारा धरहराय् कार्यशालाय् ब्वति काःपिं नीन्याम्ह चित्रकारपिंसं च्वःगु चित्रया ब्वज्या याःगु खः । कार्यशालाया झ्वलय् २२ वडा दुने लाःगु थीथी सम्पदास्थलय् हे च्वनाः प्रत्यक्ष किपा च्वयेगु ज्या जूगु खः ।
प्रदर्शनीया झ्वलय् चित्रकला कार्यशालाय् सहभागी जूपिं चित्रकारपिंत मतिनाया चिं नं देछाःगु खः । ज्याझ्वलय् न्ववानादिसें येँ मनपा २२ वडाया वडाअध्यक्ष चिनिकाजी महर्जनं झीथाय् च्वंगु सम्पदां इतिहासयात न्ह्यब्वइगु जक मखु, वर्तमानयात समृद्ध यायेगु व भविष्ययात मार्गदर्शन यायेगु आधार नं बिउगु खँ धासें वडा ज्याकु पाखें थःपिनिगु वडाय् लाःगु मूर्त अमूत फुक्क कथंया सम्पदा संरक्षण व प्रचारप्रसारया निंतिं ज्या यानाच्वनागु खँ कनादिल ।
सभ्यता नेपाःया अध्यक्ष रमेशकाजी स्थापितया सभापतित्वय् जूगु ज्याझ्वलय् कार्यशालाय् च्वःगु फुक्क चित्र व उगु चित्रय् दुथ्याःगु सम्पदास्थलया बःचाहाकःगु जानकारी दुगु ‘क्यान्भासमा २२ वडाका सम्पदा’ पुस्तिका नं विमोचन याःगु खः । मू पाहाँ वडाअध्यक्ष महर्जन, सभापति स्थापित लिसें पाहाँपिं वडासदस्य अनिल हाडा, चन्द्रमान तुलाधर, ललिता खड्गीलिसें चित्रकला कार्यशालाया निंतिं प्राविधिक ग्वाहालि याःगु संस्था स्याटर्डे प्लेन एयरया कार्यवाहक अध्यष राजेन्द्र याकःमिपिंसं मंकाः कथं सफू विमोचन यानादीगु खः ।
ज्याझ्वलय् २२ वडा पाखें जूगु स्वीमिङ प्रशिक्षण व न्वचुकला प्रशिक्षणय् सहभागीपिंत नं दसिपौ लःल्हाःगु खः ।