कसाः भ्वजय् थीथी सिरपाः लःल्हात
येँ- उदाय समुदायया छगू कवः कसाःतय् थुगुसीया कसाः भ्वय् क्वचाल । कसाः तःधं गुथिया ग्वसालय् परम्परानिसें दँय्दसं होलिपुन्हिया कन्हय्कुन्हु कसाः भ्वय् न्यायेकेगु याना वयाच्वंगु खः ।
कसाः ख्यलय् गुथिया नायः युरिकाजी कसाःया सभापतित्वय् न्ह्याःगु ज्याझ्वलय् थीथी कथंया सिरपाः नं इनेज्या जूगु खः । ज्याझ्वलय् छगूनिसें गुंगू तगिंतक न्हापांगु श्रेणीइ उत्तीर्ण जुयादीपिंत बुद्धिवीरसिंह सिरपाः लःल्हाःगु खःसा एसइइनिसें मास्टर्स तगिमय् न्हापांगु श्रेणीइ उत्तीर्ण जुयादीपिंत बुद्धवीरसिंह सिरपाः कोषपाखें हनेज्या याःगु खः ।
थुकथं हे एसइइ परीक्षाय् दकलय् अप्वः ल्याः हयादीम्ह श्रयंक कसाःयात ‘नीलप्रभा सिरपाः’, प्लस टू तगिमय् अप्वः ल्याः हयादीम्ह रोजाली कसाः व स्नातक तहय् दकल अप्वः ल्याः हयादीम्ह दृष्टि कसाःयात ‘रत्नवीरसिंह हेरादेवी सिरपाः’, एमबीबीएस तहय् अप्वः ल्याः हयादीम्ह रोचक कसाःयात ‘सानुनानी सिरपाः’ लःल्हाःगु खः ।
ज्याझ्वलय् कसाः गुथि मिसा पुचःपाखें थुगुसी जिथि हनेज्याझ्वलय् बहाः कवःया चन्द्रकेशरी कसाःयात हनेज्या याःगु खःसा ज्यासना पुचःया दुजः तःखाछेँ कवःया चन्द्रज्योति कसां च्वयादीगु ‘फिलिंग्स अफ दि मोमेन्ट’ चिनाखँ सफूया नं पितब्वज्या याःगु खः ।
कसाः जःपिनि दथुइ सुलाच्वंगु प्रतिभा पिब्वयेकथं जूगु सांस्कृतिक ज्याझ्वलय् रीना कसां चिनाखँ न्यंकादीगु खःसा आज्ञा कसाः, पवित्र कसाः, समन्तरत्न कसाः, विकासरत्न कसाः, रविन्सन कसाः लगायतं सांगीतिक प्रस्तुति बियादीगु खः ।
LEAVE YOUR COMMENTS