सालकय् कोरोना भाइरस दुगु पुष्टि

एजेन्सी – चीनय् दकलय् अप्वः तस्करी जुइगु सालक (पैंगोलिन)य् कोरोना भाइरस दुगु पुष्टि जूगु दु । थुकिया जाँच यानाच्वंगु छगू अन्तर्राष्ट्रिय शोधकर्तातय्सं चीन व दक्षिणपूर्वी एशियाया जंगलय् दइपिं सालकयात ध्यान बियाः स्वयेमाःगु खँ धाःगु दु । कोरोना भाइरस वःगुलिइ उमिगु भूमिका व भविष्यय् मनूतय्त थुमिसं यायेफुगु संक्रमणया खतरा बारे पत्ता लगे यायेत नं उमिगु स्थितियात कयाः ध्यान बिइमाःगु खँ उमिसं धाःगु दु ।

चिकंलापायात कोरोना भाइरसया मू स्रोत माने याना वयाच्वंगु दु । चिकंलापां मेम्ह सु जनावरयात थ्व भाइरस सरे यानाबिउगु व उम्ह जनावरपाखें हे मनूतय्के सरे जुइगु वैज्ञानिकतय् धापू दु । आः सालकयात कोरोना भाइरस पुष्टि जूगुलिं थ्व पाखें मनूतय्के सरे जूगु अनुमान यानाहःगु खः । चीनय् सालकया तस्करी तच्वःगु मात्राय् हे जुइगुलिं नं थ्व अनुमान जूगु खः ।

इमूचा नया च्वनीपिं थ्व स्तनपायी जीव विश्वय् हे दकलय् अप्वः तस्करी जुइपिं जीवमध्ये लाः । उकिया कारणं थ्व जीव थ्यंमथ्यं लोप जुइगु अवस्थाय् दु । नेपालय् नं सालकया तस्करी जुइगु याः । इलय् ब्यलय् प्रहरीं सालक तस्करी यानाच्वंपिं ज्वनेगु नं यानाच्वंगु दु । थ्व जीवया छ्यंगू एशियाया परम्परागत वासः दयेकेगु निंतिं तसकं माग दु । सालकया ला तसकं साइगु जूगुलिं नइपिं नं दु ।

ने.सं. ११४० चौलाथ्व ३ (चैत १४)