क्यापिटल हिलय् हिंसा न्यंकूपिं विरुद्ध फौजदारी मुद्दा

एजेन्सी – अमेरिकाया न्याय मन्त्रालय व संघीय जाँच ब्युरो (एफबीआईं) वंगु वालय् अमेरिकी संसद भवन क्यापिटल हिलय् आक्रमण याःपिंविरुद्ध फौजदारी मुद्दाय् अनुसन्धान सुरु यासें थुकी संलग्नपिंत आत्मसमर्पण यायेत धाःगु दु ।

अनुसन्धान अधिकारीपिंसं थःपिंके छगू लाखं मल्याक डिजिटल प्रमाणत नागरिकतय् पाखें चूलायेधुंकूगु खँ धाःगु दु। अमेरिकी राष्ट्रपति चुनावय् त्याम्ह जो बाइडेन विजय जूगु प्रमाणित यायेगु निंतिं संसद निगुलिं सदनया मंकाः बैठक जुयाच्वंगु इलय् राष्ट्रपति ट्रम्पया समर्थकतय्सं क्यापिटल हिलय् हिंसा न्यंकूगु खः । थ्व हिंसाय् लानाः न्याम्हेसिया ज्यान वंगु खः । अमेरिकी अनुसन्धान अधिकारीतय्सं थ्व घटनाय् १६० म्हं मल्याक मनूतय् विरुद्ध फौजदारी अनुसन्धान सुरु यानागु खँ धाःगु दु।

कोलम्बियाया कार्यवाहक महान्यायाधिवक्ता माइकल शेरवीनं हिंसा न्यंकूपिं विरुद्ध आक्रमण व विद्रोहया षडयन्त्र याःगु अभियोग बीगु व थ्व अभियोगय् नीदँ तक जेल सजाँय जुइफुगु खँ धाःगु दु। एफबिआईं क्यापिटल हिल घटनाय् संलग्न मनूतय्त कानुन पालना याइगु निकाय समक्ष उपस्थित जुइत इनाप याःगु दु । एफबिआईया वाशिंगटन ज्याकूया सहनिर्देशक स्टिभन डुआन्टानों घटनाय् संलग्नपिं डिसी त्वःता वनेधुंकूगु जूसां उमि छेँय् हे प्रहरी वयेफुगु खँ धाःगु दु ।

अथेहे सिनेटर चक सुमरं घटनाया इलय् क्यापिटल हिल भवनय् दुपिंत हवाई यात्रा यायेमदइकथं प्रतिबन्ध तयेत संघीय सरकारयात इनाप याःगु दु। थ्व घटनायात प्रोत्साहित याःगु द्वपनय् राष्ट्रपति ट्रम्प विरुद्ध नं डेमोक्र्याट सांसदतय्सं महाभियोग तयेधुंकूगु दु ।