ने. सं. ११४४ कौलाथ्व षष्ठी -

चिकुं पुनाः झिंनिम्ह आप्रवासीत सीवं ग्रीसया दथुइ कूटनीतिक विवाद

एजेन्सी- ग्रीसया सिमाना न्ह्यःने लाःगु टर्कीया छगू शहरय् चिकुंपुनाः १२ म्ह आप्रवासीत सीगु खँय् टर्की व ग्रीस दथुइ कूटनीतिक विवाद ब्वलंगु दु । आप्रवासीत उगु थासय् छु जुयाः थात व गथे जुयाः थःपिं हे च्वापु जुइक ख्वयाः सित धयागु खँ बांलाक सीमदुनि, तर ग्रीस व टर्किंं थ्व घटनायात कयाः वं वयात वं वयात दोष बियाच्वंगु खँ सीएनएनं धाःगु दु ।

टर्कीया आन्तरिक मन्त्री सुलेमान सोयुलं युरोपेली युनियनय् दुहां वयेत आप्रवासी छ्यलीगु सीमावर्ती शहर इप्सालाय् १२ म्ह आप्रवासी चिकुं पुनाः सीगु धाःगु दु । सोयुलं ट्विट यासें धाःगु दु, ‘ग्रीक अधिकारीतय्सं उमिगु लाकां व लं लाकाःगु खः ।’ मन्त्री सोयुलं याःगु ट्विटय् बुलुगु किपाय् म्होतिं नं च्याम्ह सीपिनीगु म्हय् आंशिक जक लं दुगु व चाय् ग्वतुलाच्वंगु सीएनएनया रिपोर्टय् खनेदु । सोयुलं ग्रीक सीमा गस्ती व एकाइतय्त ठगया संज्ञाबिसें युरोपेली संघ ‘उपचारविहिन, कमजोर व मानवीय भावना शून्य’ जूगु धकाः नं धाःगु दु ।

ग्रीसया अध्यागमन मन्त्री नोटिस मिताराचीं सोयुलं बिउगु द्वपं अस्वीकार याःगु खु । मन्त्री मिताराचीं छगू विज्ञप्ति पिकयाः धाःगु दु, ‘इप्साला न्ह्यःने लाःगु टर्कीया सीमाय् १२ म्ह आप्रवासी सीगु दुःखद् घटना जूगु दु, तर थुकिया लिउनेया सत्य समकक्षी याःगु मखुगु प्रचार नाप ज्वःमलाः ।’ मिताराचीया कथं आप्रवासीत सीमाय् थ्यंगु हे मदु । मिताराचीं टर्कीं याःगु दावी पूवंक बकवास जूगु व अज्याःगु दावा यायेगु सट्टा थःपिनिगु दायित्व पूवंकेत व थज्याःगु खतरनाक यात्रा पनेत ज्या यायेमाः धाःगु दु ।

क्षेत्रीय अधिकारीतय्सं पिकाःगु विज्ञप्तिकथं सीपि १२ म्ह आप्रवासी दुथ्याःगु पुचलय् २२ म्ह दुगु व मेपिं झिम्हेसित मालेगु ज्या जुयाच्वंगु दु ।