बसभाडा न्यूनतम झिंप्यतका ट्याक्सीइ स्वीगुतका

येँ – सरकारं सार्वजनिक सवारी साधनया न्हूगु भाडादर कायम याःगु दु । यातायात व्यवस्थाप विभागं आइतवाः शहरी क्षेत्र व ताःहाकःगु दूरीइ वनीगु सवारी साधनया न्हूगु भाडादर सार्वजनिक याःगु दु ।शनिवाः सरकार व यातायात व्यवसायीदथुइ जूगु सहमति कथं न्हूगु भाडादर कायम याःगु खः । न्हूगु भाडादर कथं स्वनिगलय् सार्वजनिक सवारी साधनया न्यूनतम भाडादर १४ व अधिकतम दर २७ जुइ ।

प्यंगू किलोमिटर तक यात्रा याइपिंसं न्यूनतम १४ तका पुलेमाली । थ्वयां न्ह्यव १३ तका यानातःगु खःसा गाडीइ धाःसा १५ तका कायेगु याना वयाच्वंगु खः ।न्हूगु व्यवस्था कथं ५ किलोमिटर तक १६, ६ किमि तक १७, ८ किमि तक १८, १० किमितक २१, १३ किमितक २३, १६ किमि तक २५, १९ किमि तक २६ व थ्वयां अप्वः जुलकि २७ तका जुइ ।

पेट्रोलया भाः थहां वंगु आधारय् विभागं न्हूृगु भाडादर पितबीगु खः । पेट्रोलियम पदार्थया भाः न्यातकां अप्वः थहां वनकि न्हूगु भाडादर कायम यायेगु याना वयाच्वंगु दु । अथेहे चक्रपथं पिने ४ किलोमिटरं अप्वः थहां वनकि प्रति किलोमिटर २।०५ तकाया दरं भाडा कायेगु व्यवस्था यानातःगु दु ।मिटर तयातःगु ट्याक्सीइ प्रतिकिलोमिटर भाः ३९ तका कायम याःगु दु । थ्व धुंकाः २०० मिटर न्ह्याः वनकि ७।८० तका भाः क्वःछिउगु दु ।

थ्वयां न्ह्यव प्रति २०० मिटरय् ७ तका जक कया वयाच्वंगु खः । अथेहे त्रिभुवन अन्तर्राष्ट्रिय विमानस्थलं चले जुइगु पर्यटकीय ट्याक्सीइ ५ किलोमिटरया निंतिं ५२९ तका कायम याःगु दु । न्हापा ४८१ तका जक कायेगु याना वयाच्वंगु खः । ५ किलोमिटरं थहां वनकि ११५७ तका तक भाडा दर कायम याःगु दु । अथेहे विभागं मालसामान ढुवानी याइगु ट्रक व कन्टेनरया नं न्हूगु भाः कायम याःगु दु ।

सम्बन्धित बुखँ

LEAVE YOUR COMMENTS