मध्यपूर्व तनावं नेपालय् चिकं अभाव जुइमखु

येँ – अमेरिकाया व इरान दथुइ तनाव तच्वयेवं नेपालय् वइगु पेट्रोलियम पदार्थय् नं लिच्वः लाइगु खँ पिहां वयाच्वंसां नेपाल आयल निगमया अधिकारीतय्सं धाःसा तुरुन्त अज्याःगु लिच्वः मलाइगु खँ धाःगु दु ।

इरानं इराकय् च्वंगु सैन्य शिविरय् ब्यालेस्टिक क्षेप्यास्त्र कयेकेधुंकाः अन्तर्राष्ट्रिय बजारय् कच्चा चिकंया भाः थहां वंगु खः । थ्व लिपा नेपाली बजारय् नं चिकंया अभाव जुइफुगु व चिकंया भाः थहां वनेफुगु हल्ला जूगु खः । निगमं धाःसा अन्तर्राष्ट्रिय बजारय् भाः थहां वंगुलिं नेपालय् नं भाः थहां वनेफुगु तर चिकंया आपूर्ति हे धाःसा समस्या मवइगु खँ धाःगु दु ।

निगम कार्यकारी निर्देशक सुरेन्द्र कुमार पौडेलं थःपिं भारतीय आयल निगम लिसे निरन्तर सम्पर्कय् दुगु व उमिसं लछि निला तक तनाव जूसां पेट्रोल आपूर्तिइ समस्या मजुइगु जानकारी बिउगु खँ धयादीगु दु। नेपालय् वइगु चिकं फुक्कं भारतं वइगु खःसा भारतय् वइगु ८० प्रतिशत चिकं इरानं वइगु जूगुलिं इरानय् तनाव जुलकि नेपालय् नं चिकं आपूर्तिइ लिच्वः लाइगु अनुमान जूगु खः ।

कार्यकारी निर्देशक पौडेलं भारतीय आयल निगमं नेपाःयात मदिक्क पेट्रोल छ्वया हयेगु बचं बिउगु खँ नं धयादीगु दु। तर वय्कलं थ्व तनाव निलां अप्वः थहां वन धाःसा छुं जुइ धयागु धाःसा धायेमफइगु जानकारी नं बियादीगु दु। नेपालय् भण्डारण क्षमता तसकं म्हो जूगुलिं नं चिकंया अभाव जुइगु खः ला  धयागु शंका जूगु खः । नेपालय् थौंकन्हय् दुगु माग कथं मुक्कं झिन्हुया निंतिं जक भन्डारण यायेगु क्षमता दु। निगमं धाःसा भन्डारण क्षमता म्हो जूसां थौंकन्हय् पाइपलाइनं चिकं वइगुलिं अभाव मजुइगु खँ धाःगु दु ।

सम्बन्धित बुखँ

LEAVE YOUR COMMENTS