नकःमि समाजया बेकरी तालिम क्वचाल

येँ(नेपालभाषा टाइम्स)- नकःमि समाज सेवा पुचः (संघ)या ग्वसालय् न्ह्यानाच्वंगु झिन्हुयंकंया बेकरी तालिम क्वचाल । नकःमि समाजया ग्वसालय् साथी श्रम प्रशिक्षण केन्द्रया ग्वाहालि उगु तालिम जूगु खः ।

तालिम समापन ज्याझ्वलय् मूपाहांकथं झायादीम्ह नारायणलाल नकःमिं त्वाःदेवाय् मत च्याकाः ज्याझ्वःया उलेज्या यासें प्रशिक्षार्थीतय्त दसिपौ लःल्हानादीगु खः । लिसें वय्कलं तालिमयात सार्थक यायेगु निंतिं सकसिनं थःपिंसं सयेकागु सीप व ज्ञानयात व्यवहारय् छ्यलेत नं इनाप यानादिल ।

केन्द्रया प्रमुखलिसें तालिमया मुख्य प्रशिक्षक सजना नकःमिं छन्हु नं त्वःमफिक झिन्हुयंकं उपस्थित जुयाः तालिम कयादीगुलिं सकल प्रशिक्षार्थीपिंत सुभाय् देछानादिसें थम्हं सिउताःकथं फक्व बांलाक प्रशिक्षण बीगु कुतः यानागु व छुं मगाःमचाः, त्वःफिउगु दु वा मसः मसिउगु, थुइकेमाःगु दुसा न्ह्यागु इलय् नं स्वापू तयादीत इनाप यानादिल । थम्हं सिउगु ज्ञान बीगु निंतिं थः गबलें नं उसिं मचासे फक्व स्यनेकने यायेत थः तयार दुगुु वय्कलं कनादिल ।

समापन ज्याझ्वलय् प्रशिक्षार्थीपिं श्रीजा नकःमि, रत्नेश्वर नकःमि श्रेष्ठ, ज्ञानकुमार महर्जन व आकृष्टि नकःमिं तालिमय् थःपिंसं सयेकेगु ज्ञान व अनुभवयात कयाः थःथःगु नुगःखँ तयादीगु खः ।

उगु इलय् प्रशिक्षार्थीपिंसं तालिम ग्वसाः ग्वःगु संस्था नकःमि समाज सेवा पुचः (संघं)यात सुभाय् पौ व मुख्य प्रशिक्षक सजना नकःमियात मतिनाया चिं नं लःल्हाःगु खः ।

समाजया मूछ्याञ्जेलिसें कार्यवाहक नायः सूर्यबहादुर नकःमिया सभापतित्वय् जूगु समापन ज्याझ्वलय् कजि महेश नकःमिं लसकुस यानादीगु खः ।

स्वीनिम्ह प्रशिक्षार्थीं ब्वति काःगु तालिमय् डोनट (क्रिम, चकलेट, कोकोनट, सादा), पाउरोटी, बन, हटडग बन, पिज्जा, ब्राउन केक, फ्रुट केक, कुकिज, क्रोसन, बर्थ डे केकलिसें आलु चिप्स व पाउँ दयेकेगु प्रशिक्षण बिउगु खः ।