पोग्बा प्रेरित युनाइटेड विजयी

पाउल पोग्बापाखें प्रेरित म्यानचेस्टर युनाइटेडं स्ट्रोक सिटीयात ३(० गोलं बुकुसें म्यानचेस्टर सिटी लिसेया अंक दूरी चिब्या याःगु दु ।
फ्रेञ्च मिडफिल्डर पोग्बां न्हापांगु हाफय् निगू गोल यायेगु निंतिं एन्टोनियो भ्यालेन्सिया व एन्टोनी मार्सलयात ग्वाहालि याःगु खः । थप छगू गोल रामेलु लुकाकुं याःगु खः । भ्यालेन्सियां कासाया ७औं मिनेटय् गोल यासें म्यानचेस्टरयात अग्रता बिउगु खःसा पोग्बाया हे ग्वाहालिं मार्सलं कासाया ३८ औं मिनेटय् मेगु गोल याःगु खः । लुकाकुं निगूगु हाफय् ७२ औं मिनेटय् गोल याःगु खः ।
थ्व विजय लिपा युनाइटेडं सिटीया लिसें अंक दूरी १२ य् थ्यंकूगु दु । शीर्षस्थानय् लानाच्वंगु सिटीया २३ गू कासाय् ६२ अंक थ्यंगु दुसा निगूगु थासय् लानाच्वंगु युनाइटेडया नं २३ औं अंकय् ५० ल्याः थ्यंगु दु ।