एबी डि भिलियर्संं संन्यास काल

एजेन्सी- दक्षिण अफ्रिकाया पुलांम्ह कप्तान व ब्याट्सम्यान एबी डि भिलियर्स दक्वं शैलीया क्रिकेटं सन्यास कायेगु घोषणा याःगु दु । भिलियर्सं ं सन् २०१८ य् अन्तर्राष्ट्रिय क्रिकेटं सन्यास काःगु खःसां फ्रेन्चाइज लिग धाःसा म्हितावयाच्वंगु खः ।

शुक्रवाः सामाजिक सञ्जाल ट्विटर पाखें संन्यासया घोषणा यासें भिलियर्सं धाःगु दु ‘थ्व छगू न्ह्यइपुगु यात्रा जुल, तर आः जिं सन्यास कायेगु निर्णय याना ।’

एबी डि भिलियर्संं दक्षिण अप्रिकाया निंतिं ११४ टेस्ट, २२८ एकदिवसीय व ७८ टी–२० म्हितूगु दु । भिलियर्सं टेस्टय् ८,७६५ रन, एकदिवसीयय् ९,५७७ रन व टी–२०इ १,६७२ रन दयेकूगु दु ।

भिलियर्सं टेस्टय् २२ शतक व ४६ अर्धशतक दयेकूगु दुसा एकदिवसीयय् २५ शतक व ५३ अर्धशतक दयेकूगु दु । डिभिलियर्सया नामय् अन्तर्राष्ट्रिय क्रिकेटय् दकलय् याकनं शतक दयेकूगु कीर्तिमान दु । डिभिलियर्सं ३१ बलय् शतक दयेकूगु खः ।