स्वम्हेसित नेवाः अधिकार सिरपाः
येँ -नेवाः अधिकार प्राप्तीया आन्दोलनय् ताःई न्ह्यवंनिसें सक्रिय जुयादीपिं स्वम्ह हस्तीपिंत म्हिगः छगू ज्याझ्वःया दथुइ नेवाः अधिकार सिरपाः लःल्हात । वाङ्मय शताब्दीपुरुष सत्यमोहन जोशीं प्रा. माणिकलाल श्रेष्ठ, जनकवि दुर्गालाल श्रेष्ठ व नेवाः न्ह्यलुवा मल्ल के. सुन्दरयात ५०–५० द्वः तकाया नेवाः अधिकार सिरपाः लःल्हाःगु खः ।
सिरपाः गुथिया नायः डा. महेशमान श्रेष्ठया सभापतित्वय् जूगु उगु ज्याझ्वलय् सिरपाः लःल्हासें मूपाहां जोशीं नेपालय् निजी क्षेत्रं न्हापांगु सिरपाः कथं च्वसापासां श्रेष्ठ सिरपाः बीगु शुरु याःगु प्रशंग कनादिल ।
ज्याझ्वलय् वंगु छुं ई न्ह्यवं निसें उसाँय् मदयाः अस्पताल भर्ना जुयादीम्ह प्रा. माणिकलाल श्रेष्ठ थःहे उपस्थित जुयाः सिरपाः ग्रहण यानादीगु खः । वय्कः अशक्त जुयादीगुलिं ग्वसाः खलकं छेँया सुं दुजःयात सिरपाः लःल्हायेगु ग्वसाः याना तःगु खःसां ज्याझ्वःया दथुइ प्रा. श्रेष्ठ छुं सहयोगीतय् साथ कयाः थःहे ज्याझ्वलय् उपस्थित जुयादीगु खः । सिरपाः ग्रहण लिपा बःचा हाकलं सम्बोधन समेत यासें वय्कलं धयादिल, ‘डेमोक्रेसी धइगु व्यक्तिं व्यक्तियात याइगु सम्मान जक मखु जातिं जातियात याइगु सम्मान नं खः ।’
जनकवि दुर्गालाल श्रेष्ठं थौंया इलय् थम्हं पूवंके माःगु आन्दोलनया दायित्व सम्पन्न यायेगु लागिं थ्व सिरपाः छगू कथंया ‘बैनापत्ता’ थें जुयाः थःत प्राप्त जूगु खः धयादिल ।
मल्ल के. सुन्दरं थःपिंसं न्ह्याकाच्वनागु नेवाः अधिकारया आन्दोलन थौं तक नं पूरा मजूनिगु कारणं थज्याःगु सिरपाः ग्रहण यायेगु ई अझं मत्यःनि थें महसुस थःत जुयाच्वंगु बिचाः प्वंकादिल ।
ज्याझ्वलय् येँ मनपाया मेयर विद्यासुन्दर शाक्य व सांसद राजेन्द्र श्रेष्ठपिंसं नं सिरपाः त्याकादीपिं सकसितं भिंतुना बिसें नेवाः आन्दोलनयात वय्कःपिंसं अझ च्वन्ह्याकादीगु आशा यानादिल । सिरपाः गुथिया दुजः प्रा. प्रेमशान्ति तुलाधरं लसकुस यानादीगु उगु ज्याझ्वलय् दुजः डा. मनोजमान श्रेष्ठं सुभाय् बियादीगु खः ।
LEAVE YOUR COMMENTS