नेपालभाषा ब्वमिपिंसं गुरु हन
येँ (नेपालभाषा टाइम्स) – रत्नराज्यलक्ष्मी क्याम्पस व पद्मकन्या क्याम्पसय् स्नातक तगिमय् नेपालभाषा ब्वनाच्वंपिं ब्वनामिपिंसं तःजिक गुरु पुन्हि हंगु दु। ज्याझ्वलय् नेपालभाषा पुर्नस्थापना अभियानय् ग्वाहालि यानादीपिं रत्नराज्यलक्ष्मी क्याम्पसया सहायक क्याम्पस प्रमुख गोबिन्दप्रसाद आचार्य, श्रीमिला सुवाल, नानी हेरा प्रजापति, पद्यकन्या क्याम्पसया प्रो. मदनसेन वज्राचार्यलिसें रत्नराज्य लक्ष्मी क्याम्पसय् न्हापांगुखुसिइ नेपालभाषा अनलाइन कक्षा न्ह्याकादीम्ह अनुपसिंह सुवाल व नवनियुक्ति क्याम्पस प्रमुख जीवनधर ज्ञवालीपिंत हनेज्या जूगु खः ।
ज्याझ्वलय् मनिषकुमार श्रेष्ठं नेपालभाषां राष्ट्रिय अस्तित्व ल्यंकाच्वंगु जुयाः महत्वपूर्ण भाषा जूगु न्ह्यथंसें लसकुस यानादिल । अथेहे शिक्षिका श्रीमिला सुवालं रत्नराज्य लक्ष्मी क्याम्पसय् वि.सं २०७४ सालय् नेपालभाषा ब्वनामिपिसं शैक्षिक क्षेत्रय् न्हूगु ढंगं पलाः न्ह्याकादीगु खनाः उगु पलाःयात साथ बीत उगु इलय् क्याम्पस प्रशासनपाखें छुंहे व्यवस्था मयाःगु हुनिं नानीहेरा प्रजापति व थःम्हं निःशुल्क नेपालभाषा ब्वंकागु खँ लुमंका दिल । अथे हे थौंकन्हय् हानं विद्यार्थी पिनिगु कुतलं ५१, ५२ म्ह नेपालभाषा ब्वनामिपिं दयेधुंकूगु सकल नेवाः जातिया नितिं छगू लसता जूगु खँ नं न्ह्यथनादिल ।
सहायक क्याम्पस प्रमुख गोविन्द प्रसाद आचार्यं भाषा दया च्वंतले जक झीपिं दया च्वनीगु उल्लेख यासें मातृभाषाया विशेष महत्व दुगु न्ह्यथंसे ब्वनामिपिनिगु भाषिक आन्दोलनय् साथ बियाच्वनेगु धापू प्वंकादीलसा पद्मकन्या क्याम्पसया प्रो. मदनसेन बज्राचार्यं क्याम्पसय् अध्यापन याकेत छुं नं विषयलय् १० म्ह ब्वनामिपिं मंत धाःसा अध्यापन याके मज्यूगु सत्य मजूगुलि क्याम्पसया स्वविवेकं कक्षा सञ्चालन यायेफइगु न्ह्यथनादिल ।
अथे हे ज्याझ्वलय् क्याम्पस प्रमुख डा. जीवनधर ज्ञवाली अभियान्तापिंस नेपालभाषायात लजगाःलिसें स्वाकाः न्ह्यःने न्ह्याकल धाःसा जक क्याम्पसय् ब्वनामिपिनिगिु अभावं नेपालभाषा ब्वनामिपिं मदया आखः ब्वंकेगु अवस्थाया अन्त्य जुइगु धासें रत्नराज्य लक्ष्मी क्याम्पस पुर्ण रुपय् मानविकी क्याम्पस जूगुलिं न्ह्याबले फुक्कों भाषा संस्कृति मानव सभ्यतासितलिसें स्वापू विषय अध्ययन अध्यापन जुइगु खँ कनादिल ।
LEAVE YOUR COMMENTS