बिस्काः मदिकेगु फैसला वयेवं टौमढीइ लसता

ख्वप-ख्वपय् तःजिक न्यायेकीगु बिस्काः जात्रा याये दइ मखु धकाः ख्वपया सीडीओं याःगु निर्णययात सर्वोच्च अदालतं खारेज याना बिउगु दु । भारतय् कोरोनाया संक्रमण अप्वयाच्वंगु खँयात न्ह्यःने तयाः सीडीओ कार्यालयं थुगु दँया बिस्काः जात्रा मयायेगु निर्णय याःगु खः ।

सीडीओं याःगु उगु निर्णययात स्थानीय जनतां विरोध यानाच्वंगु दु । थ्वहे झ्वलय् अधिवक्ता राजकुमार सुवालं सीडीओया निर्णय विरुद्ध सर्वोच्च अदालतय् तःगु रिट तयादीगु खःसा म्हिगः न्यायाधीश पुरुषोत्तम भण्डारीया एकल इजलाशं जात्रा दिकेगु सीडीओया निर्णय खारेज यायेगु फैसला याःगु खः । सर्वोच्चं स्वास्थ्य मापदण्ड पालना यानाः जात्रा सम्पन्न यायेत निर्देशन बिउगु खः ।

सीडीओपाखें जात्रा दिकेगु निर्णय यायेवं संस्कृतिह्यमितय्सं सीडीओ ज्याकुथी हे वनाः विरोध यासें राज्यं फुटबल कासा याये जिउ, पार्टीतय्सं आमसभा याये जिउसा सर्वसाधारणं परम्परागत जात्रा जक छाय् याये मजिउ धकाः न्ह्यसः तःगु खः । उगु इलय् सीडीओं फुटबल स्वः वइपिं सकलें टिकट काटे यानाः वइगु जूगुलिं उपिं व्यवस्थित जुइ धकाः हास्यास्पद तर्क तयादीगु खः ।

बिस्काः जात्रा याके बीमखु धकाः सीडीओ सहित थीथी झिंप्यंगू संघ संस्थां याःगु उगु निर्णयया विरोध यानाः न्हियान्हिथं बाजं सहित जुलुस प्रदर्शन यानाः टौमढी त्वाः थ्वयेकेगु ज्या जुयाच्वंगु दु । चैत २३ गते सुरु जूगु थुगु विरोध ज्याझ्वः म्हिगः तकं न्ह्यानाच्वंगु खः । उकुन्हु अन द्वलंद्वः सहभागीतय्सं सनिलय् मैनमत च्याकाः मिखां मखंम्ह सरकार समक्ष मिखां खंकेत सांकेतिक रुपं दबाब बिउगु खः ।

थ्वहे झ्वलय् सर्वोच्च अदालतं म्हिगः याःगु फैसलायात लसकुस यासें म्हिगः धाःसा टौमढीइ लसता प्रदर्शन जुल । अदालतपाखें आदेश जारी जुइवं बुधवाःया विरोध प्रदर्शनयात लसता ज्याझ्वलय् हीकाः टौमढीइ अबिर ह्वलाः सिन्हः तिकाः हर्षोल्लास याःगु खः । ख्वप नगरपालिकां धाःसा व्यवस्थित, मर्यादित व कोरोनाया जोखिम म्हो यायेगु कथं जात्रा सामान्य कथं जक यायेत इनाप यासें माइकिंग याइगु जूगु दु । तौमढीइ धाःसा चैत २८ गते तक प्रदर्शन जुयाच्वनीगु धाःगु दु ।

सम्बन्धित बुखँ

LEAVE YOUR COMMENTS