अपांगता स्कुलयात स्वास्थ्य ज्वलं ग्वाहालि

ख्वप(नेपालभाषा टाइम्स)÷महालक्ष्मी विकास बैंक कालिमाति शाखापाखें अपांगता मस्तय्त आखः ब्वंकीगु स्कुलयात स्वास्थ्य सामग्री लःल्हाःगु दु । बैंकया कालिमाति शाखापाखें थनया बहुअपांगता विशेष विद्यालयया अपांगता जूपिं मस्तय् निंतिं ह्वील चेयर व ट्वाइलेट चेयर ग्वाहालिकथं लःल्हाःगु खः ।

महालक्ष्मी विकास बैंकया सामाजिक उत्तरदायित्व सम्बन्धी कार्यक्रम अन्तर्गत उगु स्वास्थ्य ज्वलं लःल्हाःगु खः । वंगु सोमवाः छगू ज्याझ्वः दथुइ बैंकया शाखा प्रमुख उत्सव माकजु श्रेष्ठं स्कुलया अध्यक्ष सुरेश प्रधानयात उगु ज्वलं लःल्हानादीगु खः ।

थनया ब्यासीइ चायेकातःगु स्कुलय् मस्कुलर डिस्ट्रफी, मिखां मखंपिं आदि यानाः ख्वीम्ह स्थानीय विद्यार्थी आखः ब्वनाच्वंगु दु ।

थुगु स्कुलयात न्हापा सेभ द चिल्ड्रेन संस्थापाखें ग्वाहालि याना वयाच्वंगु खःसा आः ग्वाहालि मवःगुलिं स्कुल संचालन यायेत तसकं थाकुया च्वंगु स्कुल व्यवस्थापन समितिं धाःगु दु ।