ने. सं. ११४४ कौलाथ्व पारू - नःलास्वनेगु

द्रुतमार्गया डीपीआरया निंतिं १७ कम्पनीया आवेदन

येँ – नेपाली सेनाया व्यवस्थापनय् निर्माण जुयाच्वंगु द्रुतमार्गया विस्तृत परियोजना प्रतिवेदन (डीपीआर) तयार यायेत झिंन्हय्गू कम्पनीं इच्छा प्वंकूगु दु । सेनाया व्यवस्थापनय् द्रुतमार्गया डीपीआर तयार यायेत स्वदेशी नापं विदेशी कम्पनीं इचछा क्यंगु खः ।

येँ–तराई मधेशया ७६.३ किलोमटरया द्रुतमार्गया निंतिं छगू स्वदेशी व झिंखुगू विदेशी कम्पनीं डीपीआर तयार यायेत आवेदन बिउगु नेपाली सेनाया प्रवक्ता गोकुल भण्डारीं जानकारी बियादीगु दु । द्रुतमार्गया डीपीआरया निंतिं आवेदन बिउगु कम्पनीइ भारत, चीन लगायत युरोपेली निर्माण कम्पनीतकं दु ।

दक्वं कम्पनीया आवेदन प्राप्त जुइवं आः उकिया अध्ययन यानाः सर्ट लिष्ट तयार यायेगु ज्या जुयाच्वंगु सेनां न्ह्यथंगु दु ।
थ्व स्वयां न्ह्यः भारतया छगू निर्माण कम्पनीं द्रुतमार्गया डीपीआर तयार याःगु खःसां तसकं थिके जूगु धासें नेपाली सेनां मेगु डीपीआर दयेकेगु निर्णय याःगु खः । द्रुतमार्ग निर्माणया निंतिं नेपाली सेनां थीथी न्यागू थासय् स्थायी व अस्थायी आधार शिविर तकं चायेके धुंकूगु दु ।

थ्वयां न्ह्यः नेपाली सेनां द्रुतमार्गया नमूना मार्ग चायेकूगु खः । सेनाया व्यवस्थापनय् न्ह्यानाच्वंगु द्रुतमार्ग निर्माणय् थौंकन्हय् नीन्यागू स्वदेशी कम्पनीं ज्या यानाच्वंगु दु । थ्व हे झ्वलय् थप निगू कम्पनी ज्याया निंतिं छनोट जुइ धुंकूगु व छगू कम्पनीया निंतिं हाकनं बोलपत्र आह्वान जुयाच्वंगु सेनां न्ह्यथंगु दु ।

अथे हे द्रुतमार्गय् लाःगु सतक जःखः च्वंगु सिमा पालेगु ज्या लिपांगु चरणय् थ्यनेधुंकूगु दु । स्वनिगलं तराई स्वाइगु दकलय् चिहाकःगु दूरीया राष्ट्रिय गौरवय द्रुतमार्ग निर्माणयात सरकारं न्हापांगु प्राथमिकताय् तयातःगु दुसा प्यदँया दुने निर्माण सम्पन्न यायेगु लक्ष्य कयातःगु द्रुतमार्ग निर्माण लिपा उकिं राष्ट्रिय अर्थतन्त्रतय् तःधंगु योगदान बीगु विश्वास कयातःगु दु ।