चन्द्रानन्द नेवाः मंत

येँ – यँ महानगरपालिका वडा १८ या पुलांम्ह वडा अध्यक्ष लिसें पुलांम्ह वामपन्थी नेता चन्द्रानन्द नेवाः मंत । वय्कः ९० दँ दुम्ह खः ।
वि.सं. २०१९ निसें हे वडाय् स्वतन्त्र उम्मेदवारया रुपय् विजयी जुया च्वनादीम्ह वय्कः वि.सं. २०३२ सालय् येँया प्रधानपञ्च समेत जुयादीगु खः । देशय् बहुदलीय व्यवस्था वयेधुंकाः २०४९ व २०५४ सालय् नं वय्कः स्वतन्त्र हे जुयाः वडाय् त्याकादीगु खः । वडाय् गबलें पराजित जुयामदीम्ह वय्कः २०७४ या चुनावय् धाःसा दना मदी ।

स्थानीय मनूतय् दथुइ गोपाल दाइ कथं परिचित भाजु नेवाः समाजसेवा लिसें शिक्षा, साहित्य ख्यलय् नं सक्रिय जुयादी । वय्कलं नेपालभाषां बाखं नं च्वयादीगु दुसा वय्कः नेपाल आदर्श माविया संस्थापक दुजः मध्ये छम्ह नं खः ।
मदुम्ह भाजु नेवाःया मस्त मदुसा जहान नं मदयेधुंकल । म्हिगः पशुपतिया आर्यघाटय् वय्कःया अन्तिम संस्कार याःगु खः ।