नेवाः जुयाया गौरव थुकथं वाःचायेके

वंगु लच्छिया दुने नेवाःख्यलय् निगू तःधंगु क्षति जुल । नेपालभाषा, जाति, मानवअधिकारया अग्रज नेपालभाषा मंकाः खलःया नायः पद्मरत्न तुलाधर व वया छुं न्हि लिपा हे नेपालभाषा ख्यःया विद्वान प्रा. डा. कमलप्रकाश मल्लया देहवसान जुल । वय्कःपिनिगु देहवसान सम्पूर्ण नेपाः देय्या निंतिं हे तःधंगु क्षति खः ।

वय्कःपिंसं थःथःगु ख्यलय् समस्त नेवाः व नेपाःया विकास व उत्थानया निंतिं तःधंगु योगदान यानावंगु दु । वय्कःपिनिगु कमी शायद हे आः गबलें पूवनी जुइ ।थुपिं निम्हं नेवाः नेतृत्वयात नेवाःख्यलं वय्कःपिं मदुगु दुःखय् बिचाः हायेकल । थीथी ख्यलं श्रद्धाञ्जली प्वंकाः ज्याझ्वःत यात । वय्कःपिनिगु लुमन्ति गुणानुस्मरण जुल ।

वय्कःपिंसं याःगु ज्याप्रति सकलें नतमस्तक जुयाः वय्कःपिंसं ल्ह्वनातःगु आज्जु पूवंकेमाःगु खँय् सकलें छधी जुल । थ्व वय्कःपिं प्रति प्वंकूगु सच्चा श्रद्धाञ्जलिकथं सकसिनं थुइकेमाः । थुपिं निम्हं व्यक्तित्व बहुआयामिक व वय्कःपिंसं थीथी ख्यलय् याःगु योगदान अतुलनीय धयागु खँय् विवाद मदु ।

वय्कःपिं नेवाःत जुयाः नं मात्र नेवाःदुने सीमित मजूसे विभिन्न आयामय् योगदान याःगुलिं हे वय्कःपिंत थीथी ख्यलं हनेगु व वय्कःपिं मदयेधुंकाः बिचाः हायेकेगु ज्या याःगु खः । प्रा. डा कमलप्रकाश मल्ल छम्ह शिक्षाविद् जक मखसे नेवाः इतिहासया गहन अध्ययन अनुसन्धान याःगु दु ।

वय्कःया गहन अध्ययनया लिच्वःकथं हे नेपाःया गुलिखे ऐतिहासिक तथ्यत पिदनाः न्हापा जुयाच्वंगु ऐतिहासिक भूल सुधार जूवंगु दु । उकथं हे नेपालभाषा अध्ययन अनुसन्धानय् नं वय्कःया गहन अध्ययनया कारणं आपालं सुलाच्वंगु तथ्य पिदंगु दु । वय्कलं नेतृत्व यानादीगु संस्थापाखें पिदंगु क्लासिकल नेवाः खँग्वः धुकू आःतक हे ज्वःमदुगु कृति खः ।

डा. कमलप्रकाश मल्ल विद्वत ख्यलय् जक मखु, वय्कलं नेवाःत संगठीत यायेत नीस्वंगु नेवाः देय् दबूया निर्माण व उकियात न्ह्याकेत तःधंगु भूमिका म्हितादीगु दु । तर थुगु विषय चर्चा मजूगु व खँ पिमदनाच्वंगु कारणं वय्कलं थुगु ख्यलय् यानादीगु ज्यायाबारे नेवाःत जक मखु स्वय्म देय्दबूलिसे सम्बन्धित पदाधिकारीत हे अनभिज्ञ जुयाच्वंगु खनेदु ।

प्रा. डा. कमलप्रकाश मल्ल व पद्मरत्न तुलाधरं न्ह्याथेंजागु राष्ट्रयात सेवा याःगु खःसां वय्कःपिं दकलेय् न्हापां नेवाः खः धयागु खँया गर्व याये फयेकेमाः । नेवाः कुलय् जन्म जुयाः नेपाः व थःगु जातिया गर्व यायेगु ज्या यानावंगु खँय् सकल स्वाभिमानी नेवाःतय्सं गर्व याये फयेकेमाः ।

छुं न्हि न्ह्यः डा. मल्लया बिचाः मुँज्याया ग्वसाः खलः स्वयं नेवाः देय् दबू जुलं नं वय्कलं देय् दबूया निर्माणय् म्हितूगु भूमिका बारे चर्चा मजुल । थ्व खँय् स्वयम वक्तापिं हे अनभिज्ञ जूगु खनेद, तर थ्व विषय जानकारपिंके न्यनेकने तकं मयाःगु कारणं डा. मल्लं नेवाः संगठन निर्माणया निंतिं म्हितादीगु भूमिकायात न्हंकेगु ज्या जूवंगु खनेदत ।

थुकिं वय्कःया व्यक्तित्वया छगू पक्षयात न्हंकेगु ज्या जूवंगु दुु । प्रा. डा. कमलप्रकाश मल्लया जुइमा वा मंकाः खलःया नायः व मानवाधिकारवादी नेता पद्मरत्न तुलाधरया योगदान जुइमा, छथ्व मनूतय्सं वय्कःपिनिगु व्यक्तित्व व योगदानया विषयय् चर्चा यायेगु इलय् नेवाः ख्यलय् जूगु महत्वपूर्ण योगदानयात स्वया नं मेमेगु ख्यलय् वय्कःपिंसं याःगु योगदानया चर्चा अप्वः यायेगु ज्या जुयाच्वंगु दुर्भाग्यपूर्ण खः ।

नेपालभाषा मंकाः खलःया नायः पद्मरत्न तुलाधरं पंचायती इलय् जनसहभागिताय् भिंतुना आन्दोलन मन्ह्याकूगु जूसा मेमेगु जनजातिया आन्दोलन धाये वा थीथी अधिकारकर्मीतय्गु आन्दोलन थुलि सशक्त मजुइगु खइ । अझ मुलुकय् थुकथंया क्रान्तिकारी राजनीतिक हिउपाः हे मवइगु खइ ।

नेपालभाषाया भिंतुना आन्दोलन हे नेपालय् जूगु फुक्क अधिकार आन्दोलनया जननी खः धयागु निक्र्यौल स्वयम विविध आन्दोलनकारी अधिकारकर्मीतय्गु दु । उकथं हे प्रा.डा. कमलप्रकाश मल्लं थःगु अध्ययनया लिधंसाय् नेपाःया ऐतिहासिक सत्य तथ्ययात उलाः हाथ्या बीगु ज्या मयाःगु खःसा थौं नेपाःया इतिहास अझं भ्रमपूर्ण जुयाच्वनीगु खइ ।

थुज्याःगु वय्कःपिनिगु योगदानयात नेवाः ख्यलं स्वयां मेमेगु ख्यलं उच्च सम्मान व आभार न्ह्यब्वयाच्वंगु खंकेफइ । थ्व ल्याखं वय्कःपिं मात्र नेवाः व्यक्तित्व स्वयां राष्ट्रिय व्यक्तित्वकथं न्ह्यःने दंवःगु आभास नं जुइ । वय्कःपिनिगु क्वचाःगु बिचाः मुंज्याय् नं वय्कःपि नेवाः व्यक्तित्व स्वयां नं इतरकथं न्ह्यब्वयेगु ज्या जूवंगु दु ।

अले थज्याःगु मुँज्या ग्वसाः खलकं नं वय्कःपिंत नेवाः व्यक्तित्वया हैसियतं बी माःगु सम्मानय् चुके जूगु खनेदु ।नेपाःया हरेक ख्यःया विकास चाहे व साहित्य जुइमा, व्यापार, व्यवसाय, उद्योग जुइमाः वा राजनीतिक ख्यः हे छाय् मजुइमाः फुक्क ख्यलय् हे नेवाः व्यक्तित्वतय्गु अहम व नेतृत्वदायी भूमिका दु ।

तर थज्याःगु गरिमायात नेवाःख्यलं कःघायेमफुगु वास्तविकता खः । छगू इलय् सहिद गगांलालयात ‘श्रेष्ठ’ धकाः मच्वयेगु, सिद्धिचरणया पूवंक जात मच्वयेगु, राजनीतिक ख्यलय् वामपन्थी विचारधाराया अग्रज पुष्पलालयात तकं नेवाः धायेके मबिइकेत छगू वर्गया षडयन्त्र अझं न्ह्याना हे च्वंगु अनुभव यायेफइ ।

नेपाःया आदिवासी, मूलवासी नेवाःतय्सं थःगु राष्ट्र निर्माणया निंतिं याःगु योगदानयात गौण क्यनेगु वा उपिं नेवाः जूसां इतर नेवाःदुने थःपिनिगु अभिभावककथं सालाकायेगु ज्याया निरन्तरता आःया पद्मरत्न तुलाधर व कमलप्रकाश मल्लया देहवसान लिपा नं खने हे दयाच्वंगु दु । थुकि स्वय्म नेवाःतय्गु अप्रत्यक्ष भूमिका दयाच्वंगु आभास नं जुयाच्वंगु वास्तविकता खः ।

प्रा. डा. कमलप्रकाश मल्ल व पद्मरत्न तुलाधरं न्ह्याथेंजागु राष्ट्रयात सेवा याःगु खःसां वय्कःपिं दकलेय् न्हापां नेवाः खः धयागु खँया गर्व याये फयेकेमाः । नेवाः कुलय् जन्म जुयाः नेपाः व थःगु जातिया गर्व यायेगु ज्या यानावंगु खँय् सकल स्वाभिमानी नेवाःतय्सं गर्व याये फयेकेमाः । थःपिनिगु पहिचानया दुने वय्कपिंत न्ह्याबलें शीर्ष स्थानय् तयेगु सोच ब्वलंकेमाः ।

सम्बन्धित बुखँ

LEAVE YOUR COMMENTS