एमसीसी काण्डय् सञ्चारमन्त्रीया राजीनामा फ्वन

येँ – सत्तारुढ दल नेपाल कम्युनिष्ट पार्टीया सांसदतय्सं सञ्चार तथा सूचना प्रविधि मन्त्री गोकुल बास्कोटाया राजीनामा माग याःगु दु । प्रतिनिधिसभाया अन्तर्राष्ट्रिय समितिइ जूगु सहलहय् सञ्चारमन्त्रीं बास्कोटां आपत्तिजनक अभिव्यक्ति बिउगु धासें सांसद सुदन किराँतीं सञ्चारमन्त्री बास्कोटाया राजीनामा फ्वनादीगु खः ।

संसदया बैठकय् न्ववायेगु झ्वलय् सांसद किराँतीं सरकारया प्रवक्तां मिलेनियम च्यालेञ्ज कर्पोरेशन (एमसीसी) गुगुं नं हालतय् पास जुइ, अमेरिकां चाहे जुल धाःसा थ्व देय्या नेतातय्त सुलेमानी दयेका बी धाःगु दु, थ्व आपत्तिजनक खँ खः धासें राष्ट्रिय स्वाधिनताय् थःगु हे सरकारया प्रवक्तां न्ववाःगु खँ गलत जूगुलिं सञ्चारमन्त्रीं राजीनामा बीमाः धकाः माग यानादीगु खः । वय्कलं थ्व आत्मसमपर्ण प्रवृत्ति खः धासें सञ्चारमन्त्रीं नैतिकताया आधारय् राजीनामा बीमाःगु माग नं यानादीगु दु ।

समितिया बैठकय् सञ्चारमन्त्री बास्कोटां एमसीसीया विषयय् वंगु बिहीवाः न्ववासें एमसीसी बारे गलत हल्ला न्यंकूगु धासें धयादीगु खः, ‘अमेरिकां चाहे जुल धाःसा हलिंया गुगुं नं कुनय् क्षेप्यास्त्र कयेकेफु, नेपालय् बेस क्याम्प तयेगु आवश्यकता मदु, उकुन्हु इरानय् मखना ला सुयात कयेकूगु ?’

सत्तारुढ दल दुने एमसीसी पारित याके जिउ वा मजिउ धइगु बारे विवाद जुयाच्वंगु दु । नेकपाया न्ह्यानाच्वंगु केन्द्रीय समितिया बैठकय् तकं एमसीसीया विवाद जुयाच्वंगु दु । मेखे प्रधानमन्त्री ओलीं धाःसा थ्वहे हिउँदे अधिवेशनय् एमसीसीयात अनुमोदन याकेमाःगु धापू तया वयाच्वंगु दुसा पार्टीया सचिवालयया दुजः लिसें सांसद भीम रावलं एमसीसी गुगुं नं हालतय् पारित याये मजिउगु खँ धायेगु यानाच्वंगु दु ।

सम्बन्धित बुखँ

LEAVE YOUR COMMENTS