ने. सं. ११४३ तछलाथ्व द्वादशी -

स्वंगूगु लहर हे ब्वलंगु खःला ?

येँ – देय्न्यंकं छक्वलं कोरोना संक्रमण अप्वया वनेवं आः हानं लकडाउन याइगु खः लाकि धइगु ग्याःचिकु ब्वलंगु दु । सरकारं आः हथासं लकडाउन याइगु अवस्था मदु धकाः धयाच्वंसां विज्ञतय्सं धाःसा संक्रमितया ल्याः अझ हे थहां वने फुगु खँ धाःगु दु ।

वंगु झिन्हुया दुने देय्न्यंकं संक्रमितया ल्याः छथुं हे १५ गुणा अप्वया वंगु दु । विज्ञतय्सं धाःकथं विदेशया अनुभव स्वयेबलय् नेपालय् आः वइगु छुं वाः तक थ्व ल्याः अझ हे अप्वया वनीगु सम्भावना खने दयाच्वंगु दु ।

आः अप्वया वनाच्वंगु थ्व ल्याः स्वयेबलय् नेपालय् महामारीया स्वंगूगु लहर शुरु जूगु खः लाकि धइगु आशंका समेत जूगु खँ नं विज्ञतय्सं धाःगु दु ।

थ्वहे झ्वलय् देशय् कोरोनाया महामारी अप्वया वंसां सरकारं धाःसा हथासं लकडाउन मयाइगु खँ धाःगु दु । स्वास्थ्य तथा जनसंख्या मन्त्री विरोध खतिवडां म्हिगः किपू अस्पतालय् जूगु छगू ज्याझ्वलय् न्ववासें थ्व स्वयां न्ह्यः मेमेगु देय्या खँ न्यनाः लकडाउन याःगु खःसां आः धाःसा आवश्यकता व थाय् स्वयाः जक सरकारं लकडाउन याइगु खँ धयादीगु खः ।

थ्व स्वयां न्ह्यःया लकडाउनं देय्या आर्थिक, सामाजिक व शैक्षिक क्षेत्रय् बांमलाक लिच्वः लाकूगु धासें आः लकडाउन हे समाधान खः धइगु कथं सरकार मवनीगु खँ नं वय्कलं कनादीगु दु ।

उकथं हे वय्कलं कोरोनाया स्वंगूगु भेरियन्टपाखें बचे जुइत होसियार जुइमाः धासें मास्क व स्यानिटाइजर अनिवार्य रुपं छ्यलेत इनाप नं यानादीगु दु । न्हापांगु व निगूगु डोज कयाः सुरक्षित जुइत इनाप यासें वय्कलं विज्ञतय्सं बुस्टर डोज कायेधुंकाः स्वंगूगु भेरियन्टपाखें बचे जुइत अःपुइगु जूगुलिं माघया न्हापांगु वाःनिसें अग्रपंक्तिइ च्वनाः ज्या याइपिंत बुस्टर डोज बीत्यनागु खँ नं कनादिल । माघ निगूगु वालय् ६० दँ स्वयां च्वय्यापिंत व स्वंगूगु व प्यंगूगु वालय् आम नागरिकयात कोरोना विरुद्धया बुस्टर डोज उपलब्ध याकेगु तयारी सरकारं यानाच्वंगु खँ नं वय्कलं कनादिल ।