थिमिइ वृहत किपा ब्वज्या

ये – नेपाल फोटो पत्रकार महासंघ, ख्वप कचा व रोट्र्याक्ट क्लब मध्यपुर थिमिया मंकाः ग्वसालय् थिमिइ छन्हुुया बृहत सांस्कृतिक किपा ब्वज्या जुल । मध्यपुर थिमि नगरपालिकाया २३ क्वःगु स्थापना दिवसलिसें ख्वपया नांजाःगु ऐतिहासिक बिस्काः जात्राया लसताय् लाकाः उगु किपा ब्वज्या जूगु खः । मध्यपुर थिमि नगरपालिकाया वडा नं. ८ बोडेय् जूगु किपा ब्वज्याया उलेज्या नगरपालिकाया प्रमुख मदनसुन्दर श्रेष्ठं यानादीगु खः ।

राष्ट्रिय समाचार समिति (रासस)या फोटो पत्रकार रत्न श्रेष्ठ, रमेश गिरी, नवीन पौडेल, स्थानीय फोटोग्राफर चन्द्र चक्रधर, समिर प्रजापति, संजय था, विज्ञान प्रजापति व प्रकाश चित्रकारपिंसं कयादीगु थीथी ई व जात्राया किपा ब्वज्या जूगु खः ।

मध्यपु थिमि नगरपालिकाया ग्वाहालिइ जूगु ब्वज्याय् नगरपालिका दुने संचालन जूगु विकास निर्माणलिसें सम्पदा, थीथी ऐतिहासिक धरोहरया पुनःनिर्माण, जिर्णोद्वार, जात्रापर्व, नखःचखःलिसे सम्बन्धित सत्या स्वयां अप्वः किपाया ब्वज्या जूगु किपा ब्वज्याया संयोजकलिसें नेपाल फोटो पत्रकार महासंघया केन्द्रीय कोषाध्यक्ष श्रेष्ठं जानकारी बियादीगु दु । बोडेय् जूगु किपा ब्वज्या मेगु निगू थासय् नं यायेगु ग्वसाः दुगु वय्कलं कनादिल ।