ट्राफिक व्यवस्थापन व संरचना निर्माण अनुगमनया निंतिं समिति

येँ – गृहमन्त्री रामबहादुर थापा बादलया संयोजकत्वय् स्वनिगःया ट्राफिक व्यवस्थापन नापं सतक व ताँ निर्माणया अनुमगन यायेगु ल्याखं छगू समिति गठन याइगु जूगु दु । ट्राफिक व्यवस्थापन नापं भौतिक संरचना निर्माणय् जुयाच्वंगु ढिलासुस्ती लगायत सम्बन्धित मेमेगु विषयय् नियमित रुपं समन्वय व अनुगमन योगु ल्याखं मन्त्री थापाया नेतृत्वय् समन्वय समिति गठन यायेत्यंगु खः ।सतकलिसें स्वानाच्वंगु क्षेत्रत महानगरपालिका, नगरपालिकानापं विद्युत प्राधिकरण, दूरसंचार प्राधिकरण, सडक विभाग, यातायात व्यवस्था विभाग, धःया व्यवस्थापन याइगु निकाय व थीथी राजनीतिक दलया प्रतिनिधि दुथ्याकाः उकथंया समिति गठन यायेगु प्रस्ताव याःगु खः । मन्त्रालयय् वंगु छुं दिं न्ह्यः सरोकारवाला निकायया प्रतिनिधितय् दथुइ च्वंगु छगू मुँज्यां उकथंया समिति गठन यायेगु प्रस्ताव याःगु खः । उगु इलय् मन्त्री थापां स्वनिगःया ट्राफिक व्यवस्थापनय् ज्या खने दइकथंया योजना दयेकेत नं सरोकारवाला निकाययात निर्देशन बियादीगु खः । सरोकारवाला निकायया फक्व याकनं मेगु छगू मुँज्या च्वनाः समिति गठन यायेगु सहमति याःगु खः ।