
भ्वँत – नमराय् च्वंम्ह मूलम्ह भगवान द्यःया देगः ल्ह्वनेगु तयारी शुरु जूगु दु । २०७२ सालया तःभुखाचं देगः बांमलाक क्षति जुइवं स्वदँ लिपा नमराया मू देगः ल्ह्वनेगु तयारी जूगु खः । उकिया निंतिं थ्व हे भदौ महिना दुने देगः पियाः न्हूगु दयेके निंतिं तयारी जुयाच्वंगु दु ।
नेवाः मौलिकतां जाःगु उगु देगः पुलांगु हे पहः व मौलिकता मस्यनीकथं पुरातत्व विभागं दयेकेत्यंगु खः ।
देगः दनेगु निंतिं स्थानीय छम्ह लामा थरया मनूया ठेक्का बिउगु दु । देगः दनेत लागत व सामान्य अनुमानित खर्च पिकायेगु ज्या मजूसां थ्व भदौ दुने देगः पीगु ज्या न्ह्याइगु नमराया पुलांम्ह पुजारी मानकाजी वज्राचार्यं कनादिल । नमरा देगःया संरक्षण थःपिंसं याना वयाच्वनागु खःसां विभागं थःपिंके छुं मन्यँसे जिर्णोद्वारया ज्या न्ह्याकूगु धासें पुजारी बुद्धिलाल वज्राचार्यं असन्तुष्टि प्वंकादिल ।
दँय्दसं जुगःचः¥हे (पंचदान) कुन्हु पन्तिइ यंकाः स्वन्हुतक जात्रा यायेमाःम्ह नमरा भगवान द्यःया न्हियान्हिथं पुजा यायेगु, इलय्ब्यलय् भ्वय् यायेगु व थीथी ज्याया निंतिं धकाः ४० रोपनी जग्गा तयातःगु व व हे जग्गां माःगु सकतां ज्या जुयाच्वंगु पुलांम्ह पुजारी मानकाजीं कनादिल ।
LEAVE YOUR COMMENTS