राज्ययात नेवाःतय्गु खबरदारी

येँ – शहीद दिवसया लसताय् लाकाः नेवाःतय्सं राज्ययात खबरदार यासें म्हिगः वंघलय् छगः वृहत् सभा यात । नेवाः व तामाङ बाहुल्यता दुगु प्रदेश नं. ३ या नां बागमति तयाः थनया पहिचान न्हंकेगु ज्या याःगुलिं उकिया विरोध यासें आः न्हूगु कथंया नेवाः आन्दोलन न्ह्याकेगु संकेत कथं म्हिगः उगु सभा याःगु खः ।

जनस्तरीय अभियान नां तयाः याःगु उगु ज्याझ्वलय् थौंकन्हय् नेवाः सरोकारलिसे स्वापू तयाः न्ह्यानाच्वंगु थीथी अभियानया न्ह्यलुवातय्सं न्ववानादीगु खः । शहीद शुक्रराज जोशीं वहे वंघः त्वालय् भाषण यासें न्हापांखुसी राणा शासन विरुद्ध क्रान्तिया आह्वान यानादीगु खः ।

ज्याझ्वलय् न्ववासें नेवाः न्ह्यलुवा मल्ल के. सुन्दरं देशय् परिवर्तन वयेधुंकाः तयार याःगु अन्तरिम संविधानय् दुगु व्यवस्था तकं न्हूगु संविधानं खारेज याःगु धासें उगु अधिकार कायेगु लागिं आः न्हूकथं आन्दोलन यायेमाःगु बिचाः न्ह्यःने तयादिल ।

नेवाः न्ह्यलुवा लिसें समाजवादी पार्टीया सह अध्यक्ष राजेन्द्र श्रेष्ठं देशय् संघीयता वःसां नेपाली जनतां उकिया उपभोग याये मखंनिगु कारणं अझ नं आन्दोलन आवश्यक दनि धयादिल । डा. महेशमान श्रेष्ठं नेवाः स्वायत्त राज्यया आन्दोलन न्ह्याकु न्ह्याकुं थ्वहे संविधानय् दुगु नेवाः सांस्कृतिक स्वायत्त क्षेत्रया अधिकार प्राप्त यायेगु आन्दोलन नं न्ह्याकेमाःगु खँ न्ह्यःने तयादिल । नेपाली कांग्रेसया नेता तीर्थराम श्रेष्ठं नेवाःतय् पहिचान मदुगु बागमति प्रदेश नांयात झीसं स्वीकार याये फइ मखु धासें नेवाः–ताम्सालिङ नां तयेमाःगु माग यानादिल ।

नेपाः राष्ट्रिय पार्टीया नायः डा. विजय सैंजुं आः नेवाःतय्सं राज्य पुनर्संरचना आयोगं न्ह्यब्वःगु प्रस्ताव कार्यान्वयन याकेत बः धयादिल । ज्याझ्वलय् जनकवि दुर्गालाल श्रेष्ठ लगायत ल्याय्म्ह कार्यकर्तापिं सुमन साय्मि, सुरज महर्जन, श्यामकृष्ण प्रजापति आदिपिंसं नं सम्बोधन यासें आः न्हूगु ढंगं आन्दोलन न्ह्याकेमाःगु बिचाः तयादीगु खः ।

सम्बन्धित बुखँ

LEAVE YOUR COMMENTS