किपुली नेपालभाषा पाठ्यक्रम याकनं तयार जुइगु

किपू- किपू नगरपालिका दुने लाःगु फुक्कं स्कूलय् १ निसें ३ तगिं नेपालभाषा विषय ब्वंकेगु निंतिं पाठ्यक्रम तयार जुयाच्वंगु खँ धाःगु दु । नेपालभाषा ब्वंकीपिं शिक्षकतय्त बियाच्वंगु तालिम क्वचायेकेगु ज्याझ्वलय् न्ववानादिसें किपू नगरपालिकाया मेयर रमेश महर्जनं पाठ्यक्रम याकनं तयार जुइगु जानकारी बियादीगु खः । वय्कलं किपूया स्थानीय विषययात कयाः हे पाठयक्रम तयार जुयाच्वंगु न्ह्यथँसें धयादीगु दु, ‘स्थानीय विषयया हे कयाः पाठ्यक्रम जूगुलिं थ्व हे शैक्षिक सत्रनिसें ब्वंकेगु निंतिं शिक्षकतय्त समस्या जुइमखु ।’

अथेहे उपमेयर सरस्वती खड्का रिजालं नेपालभाषा ब्वंकेगु निंतिं नगरपालिकापाखें हाकनं हाकनं तालिम बीगु ज्या निरन्तर जुयाच्वनीगु खँ धयादिल ।
अथेहे ज्याझ्वलय् न्ववानादिसें प्रा. धर्मराज डंगोलं शिक्षकपिंसं रचनात्मक ढंगं ब्वंकेमाःगु खँ न्ह्यथँसें थौंकन्हय् शिक्षण परिवेश कथं रचनात्मक ढंगंं ब्वंकेफत धाःसा मस्तय् नं डाइनामिक जुयाः पिहां वइ धयादिल ।

वंगु बुधवाः निसें सुरु जूगु थ्व तालिमय् किपूया थीथी स्कूलया स्वीम्हं मल्याक शिक्षकपिंसं ब्वति काःगु खः । किपू नगरपालिकां थःगु नपा दुने लाःगु सरकारी व निजी यानाः फुक्कं स्कुलय् कक्षा १ निसें ३ तक स्थानीय विषयया रुपय् नेपालभाषा ब्वंकेगु निर्णय यायेधुंकूगु दु ।