संगीतज्ञ नकःमिया लुमन्तिइ विचाः मुँज्या

येँ (नेपालभाषा टाइम्स) – नेपाःया भजन संगीतया ज्वःमदुम्ह व्यक्तित्व, गायक, संगीतकार, दबूप्याखंया स्यनामि व च्वमि मदुम्ह भीमबहादुर नकःमिया झिंस्वन्हुया पुण्य तिथिइ विचाः मुँज्या जुल । वंगु शनिवाः बलम्बुस्थित वय्कःया कुल छेँय् उगु विचाः मुँज्या जूगु खः ।

विचाः मुँज्याय् सांसद केशव पोखरेलं व्यक्तिगत व सामाजिक दायित्वं हे मनूयात उत्सर्गय् थ्यंकीगु खँ न्ह्यथनादिसें छम्ह व्यक्तिं तःगू विधा व तःगू पदय् च्वनाः ज्या यायेगु मौका दइगु धइगु हे वयात जनतां ययेकीगुलिं खः धयादिल । चन्द्रागिरि नगरपालिकाया प्रमुख घनश्याम गिरीं मदुम्ह नकःमि बहुप्रतिभाशाली व्यक्ति जूगु खँ न्ह्यथनादिसें आः वय्कःया नामं प्रतिष्ठान चायेकाः वय्कलं समाजयात बियादीगु योगदानया कदर नगरपालिकापाखें यायेगु प्रतिवद्धता प्वंकादिल ।

शिक्षक जितबहादुर महर्जनं मदुम्ह नकःमिं शिक्षाया लागाय् बियादीगु योगदान व वय्कःया प्रगतिशील विचाः व ज्यायात कयाः नुगःखँ प्वंकादीगु खः । स्थानीय युवा प्रतिभा शान्तकुमार महर्जनं साहित्यिक व दार्शनिक भावनां हे मदुम्ह नकःमियात थौं अमर याना बिउगु खँ कनादिल । ज्याझ्वलय् बलम्बु ज्ञानमाला भजन खलःया लक्ष्मीबहादुर श्रेष्ठ, चन्द्रागिरि नगरपालिका वडा नं. १२या वडाअध्यक्ष प्रकाश श्रेष्ठ, मदुम्ह नकःमिया छय् नापं नेपालभाषा संकिपा ख्यःया नांजाःम्ह नायिका आशिष्मा नकःमिपिंसं नं वय्कःया थीथी पक्षयात कयाः विचाः प्वंकादीगु खः ।