नेवाः बाजं ब्वज्या

येँ – येँ महानगरपालिकाया उपमेयर हरिप्रभा खड्गीं नेवाः सांस्कृतिक मौलिक बाजं संरक्षण व संवद्र्धन यायेमाःगु खँय् बः बियादीगु दु । लिसें वय्कलं महानगरपालिकां संस्कृति संरक्षणया निंतिं बजेट फ्यानातयागु दु धकाः नं धयादिल । संस्था दर्ता यानाः मनपां फ्यानातःगु बजेट उपयोग यायेत नं वय्कलं बः बियादिल ।

येँयाः पुन्हिया लसताय् नायः खिंबाजं खलकं येँया मरुध्वाखाय् जूगु नेवाः सांस्कृतिक बाजं ब्वज्यालिसें भिंतुना कालबिल ज्याझ्वलय् वय्कलं उगु खँ धयादीगु खः । अथे हे वय्कलं मिसापिंत नं थःथःगु इच्छा कथं ज्या यानाः न्ह्यःने वनेत इनाप यानादिसें उकिया नितिं अनिवार्य रुपं शिक्षा कायेमाःगु खँय् बःबियादिलः ।

ज्याझ्वलय् नेपाल खड्गी सेवा समितिया संरक्षक मनोज नेवाः खड्गीं कुमारी, गणेश व भैरवया खः सालीबलय् थीथी बाजं खलकं ब्वति कयाः न्ह्याइपुकेगु लिसें थःगु मौलिक पहिचान ल्यंका तयेगु निंतिं नं झी सकलें जायेमाः धयादिल । नायः खिं बाजं खलःया नायः बिजय शाहीं थीथी बाजं खलःतय्गु दथुइ थवंथवय् मिलेजुयाः येँयाः नखःयात सभ्य व भव्य कथं हनेगु नितिं थुगु ज्याझ्वः यानागु जानकारी बियादीगु खः ।