दिगुख्यः मिसा पुचःया न्हूधाः

येँ – श्री दिगुख्यः मिसा पुचःया न्हूधाः जूगु दु । गुथिया ज्यासना पुचःया ग्वसालय् नायः रमेश तुलाधरया सभापतित्वय् जूगु छगू ज्याझ्वःया दथुइ गुथिया मिसा पुचःया न्हूधाः याःगु खः । न्हूधाःकथं पुष्पहिरा तुलाधरया अध्यक्षताय् न्हूगु ज्यासना पुचः ल्यःगु खः । न्हूगु ज्यासना पुचलय् दिव्यतारा तुलाधर न्वकु, सरिता तुलाधर छ्याञ्जे, सरस्वती तुलाधर लिउछ्याञ्जे ल्यःगु दुसा दुजलय् तारादेवी तुलाधर, समीना तुलाधर, रोहिणी तुलाधरयात ल्यःगु दु ।

ज्याझ्वलय् गुथिया नायः तुलाधरं पुलांगु ज्यासना पुचःयात विदाई बियादिसें न्हूगु ज्यासना पुचःया कार्यकाल सुथां लायेमा धकाः भिंतुना देछानादीगु खः । अथे हे उदाय समाज मिसा पुचःया नायः कीर्ति तुलाधर, पुलांगु ज्यासना पुचःया नायः प्रेमशान्ति तुलाधर, श्री दिगुख्यः गुथिया ज्यासना पुचःया निवर्तमान नायः लक्ष्मीरत्न तुलाधरपिंसं नं न्हूगु ज्यासना पुचःया कार्यकाल सफलताया कामना यासे भिंतुना देछानादीगु खः ।