
येँ -राष्ट्रपति विद्यादेवी भण्डारीया निंतिं हेलिप्याडय् सोफाया सुविधा बिउगु खँयात कयाः आलोचना शुरु जूगु दु । राष्ट्रपति भण्डारी वंगु मंगलवाः शहीद स्मारक लिसें प्रजातान्त्रिक पार्कया उलेज्या यायेत हेलिकोप्टरय् च्वनाः हेटौंडा झाःगु खः । वय्कः हेटौंडा झाःगु इलय् तक स्थिति सामान्य हे जुल तर वय्कः लिहां वयेगु झ्वलय् मुख्यमन्त्री डोरमणि पौडेल व बागमति प्रदेश प्रमुखं क्यंगु चाकडी धाःसा आलोचनाया विषय जुया बिल ।
राष्ट्रपति पूर्वनिर्धारित ज्याझ्वः क्वचायेकाः लिहां वयेगु झ्वलय् प्रदेश प्रमुख, मुख्यमन्त्री व फुक्कं मन्त्रीत विदाइ यायेत हेलिप्याडय् वल । विदाइ ज्याझ्वःया झ्वलय् मंकाः किपा कायेगु ज्या जूगु खः । तर उगु इलय् राष्ट्रपतिया निंतिं हेलिप्याडय् हे सोफासेट थ्यंके हल । राष्ट्रपति सोफासेटय् च्वनाः मेपिं चाहिँ जःखः च्वनाः किपा काल । थ्व किपा सामाजिक सञ्जालय् भाइरल जुल । तर अज्याःगु थासय् तकं सोफा तयाः राष्ट्रपतिया किपा काःगु धाःसा अतिकं अस्वाभाविक खने दत धासें उकिया आलोचना जूगु खः ।
LEAVE YOUR COMMENTS