लकडाउनया इलय् लागू वासः मीपिं सक्रिय

येँ – देय् पूवंक लकडाउन जुयाच्वंगु इलय् अवैध लागू वासः मीपिं सक्रिय जुयावःगु दु । लागू वासः मीपिं मोटरसाइकलय् वयाः लागूपदार्थ दुर्व्यसनीतय्त बीत थीथी थासय् वनाच्वंगु लूगु दु ।

लागू वासः मीपिं गिरोहतय्सं दुर्व्यसनी दइगु थासय् गजि लिसें वासः पसलय् मीत प्रतिबन्ध तयातःगु वासः मीगु यानाच्वंगु खः । अज्याःगु वासः दुव्र्यसनीया थासय् थ्यंकेत छगू पुचः हे सक्रिय जुयाच्वंगु ‘नेपालभाषा टाइम्स’ प्रतिनिधि प्रत्यक्ष रुपं खंगु खः ।

थनया १२ वडा दुव्र्यसनीत च्वनीगु थासय् वयाः उमिसं अज्याःगु वासः हया बीगु यानाच्वगु खःसा मेमेगु थासय् उमिसं उकथं हे अज्याःगु वासः डेलिभरी यायेगु यानाच्वंगु खः ।

लागू पदार्थ दुर्व्यसनी छ्यलिइगु डाइजेपाम, नाइट्रोजेल, नोस्ट्रोजाम लिसें आपालं कथंया वासः उमिसं डेलिभरी यानाच्वंगु खनेदु । नां कने मयःम्ह छम्ह पुलांम्ह लागू पदार्थ दुव्यसनीया कथं थौं कन्हय् बजारय् आपालं कथंया लागू वासः छ्यलेगु यानाच्वंगु दु । थीथी व्यक्तिं थीथी कथंया वासः छ्यलेगु यानाच्वंगु जानकारी बियादिसें अज्याःगु तःताजि सामान्य मनूयात वासः यायेतमाःगु वासः दुव्यसनीतय्सं छ्यलेगु यानाच्वंगु खँ वय्कलं धयादीगु दु ।

छखे कोरोना भाइरस संक्रमणया कारणं यानाः आपालं धयाथें प्रहरी थःथःगु क्षेत्रय् व्यस्त जुयाच्वंगु थज्याःगु इलय् लागू पदार्थया कारोबार याइपिंसं बजाः भाः स्वयां झिदुगं अप्वः कयाः उकथं लागू वासः दुव्र्यसनीया थासय् थ्यंकेगु यानाच्वंगु खः ।

ने.सं. ११४० चौलाथ्व ३ (चैत १४)